97:1 耶和華做王！地著快樂！眾海嶼著歡喜！
97:2 密雲及黑暗佇伊的四圍；義理及公平是伊寶座的地基。
97:3 火行佇伊的面前，燒伊四圍的對敵，
97:4 伊的閃爁照光世界，地看見就振動。
97:5 佇耶和華的面前，就是全地的主的面前，諸個山消溶親像蠟。
97:6 諸個天顯明伊的義；列邦看見伊的榮光。
97:7 凡若服事雕刻的偶像、用虛假的神自誇者，攏著受見誚。恁諸個神啊，攏著敬拜伊。
97:8 耶和華啊，因為你的判斷錫安聽見就歡喜；猶大的城亦攏快樂。
97:9 因為耶和華──你是至高，過全地；你是至尊，過眾神明。
97:10 疼耶和華的人，恁攏著怨恨歹；伊保護伊聖的百姓的生命，伊拯救脫離歹人的手。
97:11 光明是為著義人來備辦；歡喜是為著心正直的人來備辦。
97:12 義人啊，恁著因為耶和華來歡喜，記念伊的聖名來謳咾。