32:1 〔大衛的教示的詩。〕過失得著赦免，罪過得著遮蓋者，這人有福氣！
32:2 耶和華無算伊做有罪，伊的心無奸詐者，這人有福氣！
32:3 我靜靜的時，我的骨頭枯焦。因為我通日大聲哮。
32:4 因為暝日，你的手重重扼我；我的精液，變親像夏天的乾燥。（細拉）
32:5 我對你排列我的罪過，無隱瞞我的罪惡。我講：我欲對耶和華承認我的過失，你就赦免我犯法的罪。（細拉）
32:6 因為按呢，見若虔誠的人佇通尋著你的時著祈禱你；大水氾濫的時，的確到伊遐。
32:7 你是我閃匿的所在；你欲庇佑我脫離艱苦，你欲用得救的歌四面圍我。（細拉）
32:8 我欲教示你，指示你應該行的路；我欲注目看你來勸戒你。
32:9 呣通親像馬、騾，無智識，著用馬咬韁馬勒索約束；若無，就呣倚近你。
32:10 歹人受多多苦難；獨獨倚靠耶和華的人欲有慈愛四面圍伊。
32:11 恁義人啊，著因為耶和華來歡喜快樂；心正直的人啊，恁著出歡喜的聲。