147:1 恁著謳咾耶和華！因為唱歌謳咾咱的上帝是真好真妙；謳咾是合宜。
147:2 耶和華起造耶路撒冷，聚集以色列中受遷徙的人。
147:3 伊醫好傷心的人，包的傷。
147:4 伊算星辰的數額，隨粒給伊號名。
147:5 咱的主至大，極有氣力；伊的智慧無窮盡。
147:6 耶和華扶持謙卑的人，將歹人降低到土腳。
147:7 恁著用感謝向耶和華唱歌，彈琴唱歌謳咾咱的上帝。
147:8 伊起雲遮天，為著地備辦雨，互山發草。
147:9 伊賞賜食物互走獸及哮的烏鴉子。
147:10 伊無意愛馬的力大，伊無歡喜人的腳走。
147:11 耶和華是歡喜敬畏伊，及向望伊慈愛的人。
147:12 耶路撒冷啊，你著稱呼耶和華！錫安啊，你著謳咾你的上帝！
147:13 因為伊堅固你的門楗，賜福互你中間的子兒。
147:14 伊互你的境內太平，用上好的麥互你食飽。
147:15 伊發出命令佇地裡；伊的話頒行真緊。
147:16 伊降落雪親像綿花，亦落霜親像火灰。
147:17 伊落雹一塊一塊；伊發出寒凊，是誰擋會住？
147:18 伊一下出令，諸個就攏溶；伊互風吹，水就流。
147:19 伊將伊的話指示雅各，將伊的律例及判斷指示以色列。
147:20 伊呣曾按呢款待別國；伊的判斷，攏呣識。恁著謳咾耶和華！