42:1 〔可拉後裔教示的詩；交互樂官。〕上帝啊，我的心切切欣慕你，親像鹿切切欣慕溪水。
42:2 我的心嘴乾欣慕上帝，就是活的上帝；我啥時會到上帝面前來見伊啊？
42:3 我暝日用我的目屎準飯食；對我講無息：你的上帝佇叨落？
42:4 我早前及眾人做陣去，導到上帝的厝，用歡喜謳咾的聲，大家守節。我追念諸個事，我的心極其悲傷。
42:5 我的心啊，你啥事鬱悴？啥事佇我的內面著急？你著向望上帝，因為伊的面向我來拯救我；所以我猶久欲謳咾伊。
42:6 我的上帝啊，我的心佇我的內面鬱悴，所以我對約但的地及黑門，亦對米薩的山記念你。
42:7 你的瀑布出聲，就深淵及深淵相叫應；你的波浪你的大湧攏淹密我。
42:8 總是耶和華日時欲施出伊的慈愛；暝時，伊互我唱歌來求賞賜我活命的上帝。
42:9 我欲對上帝──我的石磐講：你啥事記得我？我啥事因為對敵的壓迫憂悶來行啊？
42:10 我的對敵譏刺我，親像拍碎我的骨頭，對我講無息：你的上帝佇叨落？
42:11 我的心啊，你啥事鬱悴？啥事佇我的內面著急？你著向望上帝，因為我猶久欲謳咾伊。伊是我的面的榮光，亦是我的上帝。