76:1 〔亞薩的詩歌，交互樂官。用絲弦的樂器。〕佇猶大，上帝互人所識；佇以色列，伊的名做大。
76:2 佇撒冷有伊的帳房；佇錫安有伊徛起的所在。
76:3 伊佇遐遏折弓的箭，及盾牌、刀劍，以及交戰的家私。（細拉）
76:4 你對搶物的山寨來，有榮光及威嚴。
76:5 心勇敢的人攏受搶劫；的睏是長長睏，英雄的人無一個會出手。
76:6 雅各的上帝啊，你的責備一下發出，車、馬攏睏重眠。
76:7 獨獨你是通驚者！你的受氣一下發出，是誰佇你的面前徛會住啊？
76:8 你對天裡互人聽判斷。地就驚惶靜靜，
76:9 就是上帝起來審判，欲救地上一切謙卑的人。（細拉）
76:10 人的受氣的確互你得著謳咾；其餘的受氣，你欲禁止。
76:11 恁著對恁的上帝──耶和華下願閣謝願；四圍的人著帶禮物貢獻佇通敬畏的主。
76:12 伊欲遏止貴族的驕氣；伊互世上的列王驚畏。