86:1 〔大衛的祈禱。〕耶和華啊，求你俯耳孔聽我，因為我是困苦喪鄉的。
86:2 求你保存我的生命，因為我是虔誠的人。我的上帝啊，你的奴僕倚靠你，求你拯救伊！
86:3 主啊，求你憐憫我，因為我通日求叫你。
86:4 主啊，求你互你的奴僕心歡喜，因為我用我的心仰望你。
86:5 主啊，因為你是好，歡喜赦免人，有豐盛的慈愛賞賜凡若求叫你的人。
86:6 耶和華啊，求你俯耳孔聽我的祈禱，俯落聽我懇求的聲。
86:7 佇我患難的日欲求叫你，你欲應我。
86:8 主啊，諸個上帝的中間無一個會比得你；你的所做亦無通比並。
86:9 主啊，你所造的萬邦攏欲來仆拜佇你的面前；亦欲榮光你的名。
86:10 因為你做大，閣行奇妙的事；只有你是上帝。
86:11 耶和華啊，求你將你的道路指示我；我欲照你的真理來行；互我專一的心敬畏你的名！
86:12 主──我的上帝啊，我欲全心謳咾你；我欲榮光你的名，到永遠。
86:13 因為，你對我發出大的慈愛；你救我的生命免落極深的陰間。
86:14 上帝啊，驕傲的人起來攻擊我，閣有強暴的黨數想我的生命，無敬奉你佇的面前。
86:15 主啊，你是仁慈恩典的上帝，無快快受氣，閣有豐盛的慈愛及誠實。
86:16 求你越過來看我，可憐我，將你的氣力賞賜你的奴僕，救你的女婢的子。
86:17 求你顯出恩典我的憑據，互怨恨我的人看見來見誚，因為耶和華──你幫助我，安慰我。