118:1 恁著感謝耶和華，因為伊是好；因為伊的慈愛永遠佇！
118:2 願以色列講：伊的慈愛永遠佇！
118:3 願亞倫的家講：伊的慈愛永遠佇！
118:4 願敬畏耶和華的人講：伊的慈愛永遠佇！
118:5 我佇危急的中間求叫耶和華，耶和華就應我，將我下佇寬闊的所在。
118:6 有耶和華及我佇，我就無驚，人欲啥法得我奈何？
118:7 佇許個幫助我者的中間，有耶和華及我佇，所以我欲看見許個怨恨我的人受報應。
118:8 倚靠耶和華，比倚靠人卡好；
118:9 倚靠耶和華，比倚靠王親卡好。
118:10 萬百姓圍纍我，我倚靠耶和華的名欲剿滅。
118:11 圍我，困我，我倚靠耶和華的名欲剿滅。
118:12 親像蜂圍我，親像燒莿帕的火，受拍熄；我倚靠耶和華的名，欲剿滅。
118:13 你出力捙我，欲互我倒，總是耶和華幫助我。
118:14 耶和華是我的氣力，是我的詩歌；伊亦成做拯救我的。
118:15 佇義人的布棚內，有歡喜的聲，拯救的聲；耶和華的正手施出大權能。
118:16 耶和華的正手抬高；耶和華的正手施出大權能。
118:17 我致到死，猶會活，續欲報揚耶和華的所做。
118:18 耶和華曾嚴嚴警戒我，總是未有將我交佇死無。
118:19 著給我開義的門；我欲入去感謝耶和華！
118:20 這是耶和華的門；義的人欲入去！
118:21 我欲感謝你，因為你已經應我，閣成做拯救我者！
118:22 師傅所棄拺的石，已經成做厝角頭的石。
118:23 這是耶和華所做的，咱的目睭看伊做奇怪。
118:24 這是耶和華所定著的日，咱佇此日的中間欲歡喜快樂！
118:25 耶和華啊！今求你拯救！耶和華啊，今求你互阮發達！
118:26 奉耶和華的名來者應該得著福氣！阮對耶和華的厝給恁祝福！
118:27 耶和華是上帝；伊的光照阮。著用索縛祭祀的精牲，到壇角。
118:28 你是我的上帝，我欲感謝你！你是我的上帝，我欲尊你做高！
118:29 恁著感謝耶和華，因為伊是好！因為伊的慈愛永遠佇！