29:1 〔大衛的詩〕大權能者的子啊，恁著將榮光、氣力歸互耶和華，歸互耶和華！
29:2 著將耶和華的名所應該得著的榮光歸互伊，用聖潔的妝飾敬拜耶和華。
29:3 耶和華的聲佇水面；榮光的上帝起雷，耶和華佇多多水的頂面。
29:4 耶和華的聲有大氣力；耶和華的聲滿滿威嚴。
29:5 耶和華的聲拍折柏香樹；耶和華拍碎黎巴嫩的柏香樹。
29:6 伊亦互伊趒跳親像牛仔，互黎巴嫩及西連趒跳親像野牛的子。
29:7 耶和華的聲互火焰分叉。
29:8 耶和華的聲振動曠野；耶和華振動加低斯的曠野。
29:9 耶和華的聲互鹿母驚著來生子，亦互樹林的樹葉落光光。見若佇殿內者，攏講榮光。
29:10 大水氾濫的時，耶和華坐做王；耶和華坐做王，直到永遠。
29:11 耶和華欲賞賜氣力互伊的百姓；耶和華欲用平安賜福伊的百姓。