89:1 〔以斯拉人以探教示的詩。〕我欲唱歌謳咾耶和華的慈愛，到佇永遠；欲用我的嘴傳你的信實到代代。
89:2 因為我曾講：慈愛欲受建立到永遠；你欲將你的信實堅固佇天裡。
89:3 我及我所揀的人立約，對我的奴僕大衛咒誓：
89:4 我欲互你的後裔，堅固到永遠；閣互你的寶座，建立到代代。（細拉）
89:5 耶和華啊，諸個天欲謳咾你的奇事；佇聖者的會中，欲謳咾你的信實。
89:6 佇空中是誰會比得耶和華？大權能者的眾子中，是誰會親像耶和華？
89:7 伊佇聖者的議會中，是大大有威嚴的上帝，比一切佇伊四圍的閣卡通驚畏。
89:8 萬軍的上帝──耶和華啊，叨落一個大權能者親像你耶和華？你的信實佇你的四圍。
89:9 海水漲高你管轄伊；海湧夯起來，你互伊平。
89:10 你拍碎拉哈伯，親像已經死的人；你用有氣力的手拍散你的對敵。
89:11 天屬你，地亦屬你；世界及其中所充滿的攏是你所建立。
89:12 南北是你所創造；他泊及黑門因為你的名來歡喜。
89:13 你有大權能的手；你的手有力，你的正手抬高高。
89:14 公平及義理是你的寶座的地基；慈愛及誠實行佇你的面前。
89:15 會識歡喜的聲者，彼個百姓有福氣！耶和華啊，佇你的面所發出的光行。
89:16 日日因為你的名來歡喜，因為你的公義得著升高。
89:17 因為你是氣力的榮光；閣因為你歡喜阮，阮的角欲得著抬高。
89:18 阮的盾牌屬佇耶和華；阮的王屬佇以色列的聖者。
89:19 當時，你佇異象中吩咐你聖的百姓，講：我用幫助的力下佇彼個有權能者的身上；對百姓中揀者我高升伊。
89:20 我尋著我的奴僕大衛，用我的聖油抹伊。
89:21 我的手欲常常及伊佇；我的手骨亦欲堅固伊。
89:22 對敵會勒索伊；兇惡的人會苦楚伊。
89:23 我欲佇伊的面前拍碎伊的對敵，攻擊彼個怨恨伊的人。
89:24 總是我的信實及我的慈愛欲及伊佇；因為我的名，伊的角欲得著抬高。
89:25 我欲互伊的手伸到海，正手伸到諸個河。
89:26 伊欲稱呼我講：你是我的父，是我的上帝，是救我的石磐。
89:27 我亦欲設立伊做大子，做世上第一高的君王。
89:28 我欲為著伊保存我的慈愛，到永遠；我及伊所立的約的確無變換。
89:29 我亦欲保存伊的後裔到代代，互伊的寶座親像天的久。
89:30 設使伊的子孫放拺我的律法，無行我的法度；
89:31 悖謬我的律例，無守我的誡命，
89:32 我就欲用柺仔責罰的過失，用鞭責罰的罪惡。
89:33 總是我的確無將我的慈愛一盡對伊收回，亦的確無互我的信實廢無。
89:34 我的確無失我的約，亦無改換我的嘴所講的。
89:35 我一擺指家己的聖潔來咒誓：我決斷無對大衛講白賊！
89:36 伊的後裔欲傳到永遠；伊的寶座佇我的面前親像日的久長，
89:37 亦親像月的永遠建立，閣親像天頂確實的干證。（細拉）
89:38 總是你有受氣你的受抹油者，厭賤棄拺伊。
89:39 你已經厭惡及你的奴僕所立的約，將伊的冕旒蹧躂佇地裡。
89:40 你已經拆伊一切的籬笆，互伊的衛所變做拋荒的所在。
89:41 過路人攏搶提伊；伊成做隔壁國所凌辱者。
89:42 你互伊的對敵的正手抬高；互伊的仇讎攏歡喜。
89:43 你互伊的刀劍倒鋩，互伊佇交戰的時徛住，
89:44 你互伊的榮顯無去，將伊的寶座捙倒佇地裡。
89:45 你減少伊青年的日子，閣互伊滿滿見誚。（細拉）
89:46 耶和華啊，你欲偌久？家己囥密到永遠嗎？你的受氣親像火欲偌久啊？
89:47 求你記得我的時間怎樣許短少；你創造一切的世間人，互到許空虛啊！
89:48 甚麼人會長長活無見著死、會救伊的靈魂脫離陰間的權柄啊！（細拉）
89:49 主啊，你前憑你的信實對大衛咒誓者許個慈愛今佇叨落？
89:50 主啊，求你記念你的奴僕所受的凌辱，記念我怎樣將一切強盛的百姓的凌辱存佇我的心內。
89:51 耶和華啊，你的對敵用此個凌辱，就是凌辱你受抹油者的 跡。
89:52 著謳咾耶和華，到永遠。阿們！閣阿們！