84:1 〔可拉的後裔的詩，交互樂官。用迦特的樂器。〕萬軍的耶和華啊，你徛起的所在怎樣許通意愛！
84:2 我的心神戀慕耶和華的殿院到昏去；我的心腸，我的肉體向活的上帝求叫。
84:3 萬軍的耶和華──我的王，我的上帝啊，雀鳥仔為著家己尋著一個厝，燕仔為著家己尋著孵子的巢，就是佇你許個祭壇遐。
84:4 徛起佇你的厝的彼號人有福氣！欲直直謳咾你。（細拉）
84:5 伊的力在佇你，的心意向錫安的大路者，彼號人有福氣！
84:6 經過「流目屎」的山谷，互伊變做水泉的所在；閣有秋天的雨的福氣給伊蓋滿。
84:7 愈行，氣力愈加添，逐人到錫安朝見上帝。
84:8 萬軍的上帝──耶和華啊，求你聽我的祈禱！雅各的上帝啊，求你俯耳孔來聽！（細拉）
84:9 做阮的盾牌的上帝啊，你著看，看你受抹油者的面！
84:10 佇你的殿院住一日，卡好一千日；寧可佇我的上帝的厝顧門，卡好踮佇歹人的布棚。
84:11 因為耶和華──上帝是日頭，是盾牌，耶和華賞賜恩惠及榮光。伊未曾留一項好物無互許個行正直的人。
84:12 萬軍的耶和華啊，倚靠你的人有福氣！