8:1 〔大衛的詩，交互樂官。用迦特的樂器。〕耶和華──阮的主啊，你的名佇全地到即高大！你將你的榮光排設佇天裡。
8:2 你因為你的對敵的緣故，對嬰仔及食奶者的嘴，建立能力，欲互對敵及報冤者靜靜。
8:3 我看你的天你的手所造的，及你所排列的月及星，
8:4 世間人是甚麼，你數念伊？人的子是甚麼，你眷顧伊？
8:5 你互伊比天使厘仔卡輸，閣賞賜伊榮光尊貴做冕旒。
8:6 你設立伊管理你的手所造的，下萬物佇伊的腳下，
8:7 就是一切的羊及牛，山野的走獸，
8:8 天中的鳥、海內的魚，及見若經過海裡的路的，攏下佇伊的腳下。
8:9 耶和華──阮的主啊，你的名佇全地到許高大！