66:1 〔一篇詩歌，交互樂官。〕全地攏著對上帝來出歡喜的聲！
66:2 唱歌謳咾伊的名的榮光！用謳咾的話來顯明伊的榮光！
66:3 著對上帝講：你的所做到許通驚！因為你的大權能，你的對敵欲降服你。
66:4 全地欲敬拜你，吟詩謳咾你，欲吟詩謳咾你的名。（細拉）
66:5 恁著來，來看上帝所行的事，伊對世間人所做的不止通驚。
66:6 伊將海變做乾地，步行過河；佇遐阮因為伊來歡喜。
66:7 伊用伊的權治理，直到永遠。伊的目睭鑑察列邦；悖逆的人呣通自高。（細拉）
66:8 萬百姓啊，恁著謳咾阮的上帝，互人聽見謳咾伊的聲。
66:9 伊互阮的生命活，亦無互阮的腳搖動。
66:10 上帝啊，你曾試驗阮，鍛煉阮，親像鍛煉銀一樣。
66:11 你互阮入羅網，用重擔下佇阮的身上。
66:12 你互人坐車過阮的頭殼；阮經過水火，總是你互阮到富有的所在。
66:13 我欲用燒祭進入你的厝，我欲對你謝我的願，
66:14 就是佇我患難的時我的嘴唇所講的，我的嘴所下的願。
66:15 我欲用肥的精牲的燒祭，及公羊的芳味獻互你，閣用公的牛，公的山羊來獻。（細拉）
66:16 凡若敬畏上帝的人，恁攏著來聽！我欲講起伊為我所行的事。
66:17 我曾用我的嘴求叫伊；用我的舌謳咾伊做高。
66:18 我若心內注重罪惡，主的確無欲聽。
66:19 總是上帝實在有聽見；已經俯落聽我祈禱的聲。
66:20 上帝是應該謳咾者！伊未曾推辭我的祈禱，亦未曾互伊的慈愛離開我。