63:1 〔大衛佇猶大曠野的時，做此首詩。〕上帝啊，你是我的上帝，我趁早欲尋你，佇亢旱困苦無水的地，我的心嘴乾數念你；我的肉體切切欣慕你。
63:2 我曾按呢佇聖所朝見你，為著愛看你的權能及你的榮光。
63:3 因為你的慈愛比生命卡好，我的嘴唇欲謳咾你。
63:4 我猶活的時欲按呢謳咾你；我欲奉你的名抬起我的手。
63:5 我的心神欲飽足親像食骨髓油膩，我亦欲用歡喜的嘴唇謳咾你，
63:6 就是我倒佇眠床記念你，佇暝間逐更數念你的時。
63:7 因為你曾幫助我，我踮佇你翅股的致蔭下欲歡喜出聲。
63:8 我的心隨你住住；你的正手扶持我。
63:9 獨獨許個數想欲滅我的生命的人，伊欲陷落佇地下深的所在；
63:10 欲互刀劍，欲互山狗食。
63:11 總是王欲因為上帝來歡喜。凡若指伊來咒誓者欲誇口，因為白賊人的嘴欲受塞密。