61:1 〔大衛的詩，交互樂官。用絲弦的樂器。〕上帝啊，求你聽我的求叫，俯落聽我祈禱！
61:2 我的心失志的時，就欲對地極求叫你。求你導我到彼個比我卡高的石磐！
61:3 因為你曾做我逃閃的所在，做我堅固的台，來脫離對敵。
61:4 我欲永遠住佇你的布棚！我欲匿佇你翅下隱密的所在！（細拉）
61:5 上帝啊，我所下的願你有聽見；你有將產業賞賜敬畏你的名的人。
61:6 你欲加添王的歲壽；伊的年歲欲到代代。
61:7 伊欲永遠坐位佇上帝的面前；願你備辦慈愛及誠實來保護伊！
61:8 按呢，我欲唱歌謳咾你的名，到永遠，通日日謝我的願。