50:1 〔亞薩的詩。〕全能的上帝──耶和華有講出話來召天下，對日出到日落的所在。
50:2 對齊全娞的錫安，上帝有發出光。
50:3 阮的上帝欲來，決斷無靜靜。有火佇伊的面前燒；有風佇伊的四圍真透。
50:4 伊欲叫頂面的天及地；為著欲審判伊的百姓，
50:5 講：著招集我聖的百姓來我遮，就是許個用祭祀及我立約的人。
50:6 諸個天欲顯明伊的公義，因為上帝本身是做審判者。（細拉）
50:7 我的百姓啊，恁著聽，我欲講！以色列啊，我欲警戒你；我是上帝，你的上帝！
50:8 我無因為你的祭祀責備你；你的燒祭常常佇我的面前。
50:9 我無對你的厝取公的牛，亦無對你的 取公的山羊。
50:10 因為，樹林內的百獸，千山的精牲攏是我的。
50:11 山中的飛鳥，我攏知；曠野的走獸亦攏屬佇我。
50:12 我若枵，無欲給你講，因為世界及其中所充滿的攏是我的。
50:13 我豈欲食牛的肉？抑是飲山羊的血嗎？
50:14 你著用感謝做祭獻互上帝，閣著對至高者謝你的願，
50:15 佇患難的日著求叫我；我欲救你，你亦欲榮光我。
50:16 若是上帝對歹人講：你豈可敢傳我的律例，嘴講起我的約啊？
50:17 其實你厭賤教示，將我的話佇你的尻脊後。
50:18 你看見賊就及伊同心，閣及行姦淫的人相及有份。
50:19 你互你的嘴常常講歹話；你的舌造作奸詐。
50:20 你坐誹謗你的兄弟，誣賴你的同胞。
50:21 你行諸個事，我靜靜無講，你拍算我抵抵及你一樣；其實我欲責備你，將諸個事排佇你的目睭前。
50:22 恁記得上帝的人，著想此個事，免致我將恁拆碎，無人拯救。
50:23 見若用感謝獻做祭的就是榮光我；謹慎行的人，我欲互伊看見上帝的救恩。