38:1 〔大衛的記念詩。〕耶和華啊，求你呣通佇受氣中責備我，呣通佇大受氣中警戒我！
38:2 因為，你的箭射我的身軀；你的手重重扼我。
38:3 因為你的受氣，我的肉無一位完全；因為我的罪過，我的骨亦無平安。
38:4 我的罪惡過我的頭殼，親像重擔互我擔起。
38:5 因為我的愚戇，我的傷爛閣臭。
38:6 我痛疼，閣曲痀，通日哀傷。
38:7 因為我滿腰是火；我的肉無一位完全。
38:8 我受拍傷，真無力；因為我的心不安，就大哀孱。
38:9 主啊，我的心願攏佇你的面前；我的吐氣無對你隱瞞。
38:10 我的心噗噗筅，我的力衰微，連我目睭中的光亦離開我。
38:11 疼我的人及我的朋友，因為我的歹症頭攏閃佇邊仔；我的親戚亦遠遠徛。
38:12 許個數想我的生命者設羅網；想欲害我的講出惡毒的話，通日想詭譎的計謀。
38:13 總是我親像臭耳聾者無聽見，親像啞口者無開嘴。
38:14 我亦親像無聽見的人，嘴無應答者。
38:15 耶和華啊，我聽候你！主──我的上帝啊，你欲聽我！
38:16 因為我曾講：驚了對我誇口；我的腳踏脫的時，對我家己尊大。
38:17 因為我險險跋倒；我的憂悶常常佇我的面前。
38:18 因為我欲認我的罪惡；閣為著我的罪來憂悶。
38:19 總是我的對敵也活動亦勇猛，無理由怨恨我的，加添愈多。
38:20 用歹報好者及我做對頭，因為我是追好。
38:21 耶和華啊，呣通放拺我！我的上帝啊，呣通離開我遠遠！
38:22 主啊，拯救我的，求你緊緊幫助我！