36:1 〔耶和華的奴僕大衛的詩，交互樂官。〕歹人的罪過有話佇我的心講：伊的目睭中無驚上帝！
36:2 因為佇伊的目睭內伊家己諂媚，拍算伊的罪惡永露現，受怨恨。
36:3 伊嘴內的話攏是罪惡及奸詐；伊及智慧好的所行已經斷絕。
36:4 伊佇眠床圖謀罪惡，伊定著意思徛佇呣好的路，伊無怨恨歹代。
36:5 耶和華啊，你的慈愛是佇天裡；你的信實到佇穹蒼。
36:6 你的義親像極高的山；你的判斷是親像深淵。耶和華啊，人及精牲，你攏保護。
36:7 上帝啊，你的慈愛怎樣許寶貝啊！世間人匿佇你翅股的致蔭下。
36:8 欲因為你的厝的好物得著飽足；你亦欲互飲你快樂的河水。
36:9 因為，活命的源頭在佇你遐；佇你的光，阮欲看見光。
36:10 願你常常施慈愛互識你的人，常常用你的公義施互心內正直的人。
36:11 呣通容允驕傲的人的腳睭踏我；呣通容允兇惡的人的手趕逐我。
36:12 佇遐，做歹的人已經倒落去；伊受捙倒，會閣起來。