146:1 恁著謳咾耶和華！我的心啊，你著謳咾耶和華！
146:2 我一生欲謳咾耶和華！我猶活的時欲唱歌謳咾我的上帝！
146:3 恁莫得倚靠君王，莫得倚靠世間人；一點仔會幫助。
146:4 伊一下斷氣，就歸土；伊所計劃的，佇彼日就消滅。
146:5 有雅各的上帝做伊的幫助，向望伊的上帝──耶和華的，此號人有福氣！
146:6 伊是創造天、地、海，及其中的萬物；伊保守誠實，到佇永遠。
146:7 伊為著受冤屈的人伸冤，賞賜食物互枵餓者。耶和華解放受關監者；
146:8 耶和華開睛暝人的目睭；耶和華扶起受壓制的人。耶和華疼惜義人。
146:9 耶和華保護出外人，扶持孤兒寡婦，獨獨歹人的道路互伊彎曲。
146:10 耶和華欲做王，到永遠！錫安啊，你的上帝欲做王，到萬代！恁著謳咾耶和華！