132:1 〔上崎仔的詩。〕耶和華啊，大衛所受一切的苦難求你記念伊！
132:2 伊怎樣對耶和華咒誓，對雅各的大權能者下願，
132:3 講：我的確無入我的家的布棚，也無上我的眠床；
132:4 我無容允我的目睭睏去，也無容允我的目睭皮合倚；
132:5 聽候我為著耶和華尋著所在，為雅各的大權能者尋著徛起的所在。
132:6 看啊，阮聽見約櫃佇以法他，阮佇樹林的田抵著伊。
132:7 阮欲入伊徛起的所在，阮欲拜佇伊的腳踏椅前。
132:8 耶和華啊，求你起來，你及你的氣力的約櫃相及入你歇睏的所在！
132:9 願你的祭司穿公義做衫！願你聖的百姓出歡喜的聲！
132:10 求你因為你的奴僕大衛的緣故，莫得棄拺你的受抹油者！
132:11 耶和華用誠實對大衛咒誓，的確無反覆，講：我欲互你所生的坐佇你的寶座。
132:12 你的子若守我的約及我所欲教示的法度，的子孫欲永遠坐佇你的寶座。
132:13 因為耶和華有揀錫安，愛用伊做本身徛起的所在，
132:14 講：這是我永遠歇睏的所在；我欲踮佇遮，因為是我所意愛的。
132:15 我欲互伊的米糧豐盛，我欲用食物互伊的喪鄉人夠額。
132:16 我欲互伊的祭司穿救恩做衫，伊聖的百姓欲出大歡喜的聲！
132:17 我欲互大衛的角佇遐發生；我為著我的受抹油者備辦光燈。
132:18 我欲互伊的對敵穿見誚做衫；總是伊的冕旒欲佇伊的頭殼頂發出光。