121:1 〔上崎仔的詩。〕我欲抬目向山；我的幫助對叨落來？
121:2 我的幫助對耶和華來，伊是創造天地的。
121:3 伊無欲互你的腳搖泏；保守你者的確無盹眠！
121:4 看啊，保守以色列的，也無盹眠也無睏去。
121:5 保守你者是耶和華；耶和華佇你的正旁做你的蔭影。
121:6 日時，太陽無傷你；暝時，月亦害你。
121:7 耶和華欲保守你，免受一切的災害；伊欲保守你的生命。
121:8 你出你入，耶和華欲保守你，對此時直到永遠。