116:1 我疼耶和華，因為伊聽我的聲，我的懇求。
116:2 伊已經俯耳孔聽我，所以我一世人欲求叫伊。
116:3 死無的索纏著我；陰間的痛苦擒著我；我抵著患難憂苦。
116:4 我就求叫耶和華的名，講：耶和華啊，今求你救我的生命！
116:5 耶和華有恩惠，有公義；阮的上帝有慈悲。
116:6 耶和華保護戇直的人；我到佇卑微的地位，伊就救我。
116:7 我的神魂啊！著歸佇你安息的所在，因為耶和華用大恩款待你，
116:8 因為你救我的生命免得死無，救我的目睭免流目屎，救我的腳免跋倒。
116:9 我欲佇耶和華的面前行佇活人的地。
116:10 我信，所以講；我受極大的困苦。
116:11 我曾著急來講：人攏是虛假！
116:12 耶和華賞賜我一切的大恩我欲用甚麼報答伊？
116:13 我欲捧起救恩的杯，求叫耶和華的名。
116:14 我欲佇伊眾百姓的面前對耶和華謝我的願。
116:15 耶和華看伊聖的百姓的死做真寶貝。
116:16 耶和華啊，我實在是你的奴僕；我是你的奴僕，是你女婢的子。你已經解開捆縛我的索。
116:17 我欲用感謝的祭獻互你，閣欲求叫耶和華的名。
116:18 我欲佇伊眾百姓的面前，對耶和華謝我的願，
116:19 佇耶和華厝的院內，佇你耶路撒冷的中間。恁著謳咾耶和華！