112:1 恁著謳咾耶和華！敬畏耶和華，大歡喜伊的命令者，此號人有福氣！
112:2 伊的後裔佇世間的確強盛；正直的人的後代的確欲得著福氣。
112:3 伊的家內有貨物，有錢財；伊的公義存到永遠。
112:4 正直的人佇黑暗的中間，有光為著伊發現；伊有恩惠，有憐憫，有公義。
112:5 施恩來借人者，有福氣；伊受審判的時欲訴明家己的事。
112:6 伊永永無搖泏；義人受記念，直到永遠。
112:7 伊呣驚歹消息；伊的心堅固，倚靠耶和華。
112:8 伊的心自在，攏無驚惶，直到伊看見伊的對敵受報應。
112:9 伊大捨施，伊賑濟喪鄉人；伊的仁義存到永遠。伊的角得著舉起，有榮光。
112:10 歹人看了克得，的確咬牙切齒來消滅；歹人的心願欲歸佇無。