103:1 〔大衛的詩。〕我的心神啊，你著謳咾耶和華！凡若佇我內面者，亦著謳咾伊的聖名！
103:2 我的心神啊，你著謳咾耶和華！呣通記得伊一切的恩惠！
103:3 伊赦免你攏總的罪，醫好你攏總的病。
103:4 伊救贖你的生命脫離死無，用仁愛及慈悲做你的冕旒。
103:5 用好物足你的心願，互你復倒少年親像鷹鳥。
103:6 耶和華行公義，為著一切受冤屈的人伸冤。
103:7 用伊的道路指示摩西，用伊的行做指示以色列人。
103:8 耶和華有憐憫，有恩典，無快快受氣，閣有豐盛的慈愛。
103:9 伊無長長責備，亦無永遠囥受氣。
103:10 伊無照咱的罪過款待咱，亦無照咱的罪惡報應咱。
103:11 因為天離開地許呢高，伊的慈愛對敬畏伊的人亦是許呢大！
103:12 東離開西有偌遠，伊互咱的罪過離開咱亦是許遠！
103:13 老父怎樣憐憫伊的子兒，耶和華憐憫敬畏伊的人亦是按呢！
103:14 因為伊知咱的體質，數念咱是土粉。
103:15 論到人，伊的日子親像草。伊的興旺親像山裡的花，
103:16 經過風一下吹，就無去；伊的原位閣認得。
103:17 總是耶和華的慈愛歸佇敬畏伊的人，對永遠到永遠；伊的公義也歸佇子子孫孫──
103:18 就是許個遵守伊的約、記念伊的教示來遵趁的人。
103:19 耶和華佇天頂設立伊的寶座；伊的國權管轄萬項有。
103:20 恁諸個有大權能的天使啊，聽伊的聲、成伊的命令的，攏著謳咾耶和華！
103:21 恁諸個做伊的眾軍兵，做伊的差使，行伊所歡喜者，攏著謳咾耶和華！
103:22 恁一切受伊創造者，佇伊所管理的逐位，攏著謳咾耶和華！我的心神啊，你著謳咾耶和華！