12:1 耶和華吩咐摩西講：
12:2 「你著吩咐以色列人講：若有婦仁人懷孕生查甫子，伊就無清氣七日，親像佇經期內垃墋的日無清氣一樣。
12:3 到第八日，彼個嬰仔著受割禮。
12:4 婦仁人猶流血，著踮佇伊的厝三十三日。清氣的日猶未滿，呣通摸聖的物，也呣通入聖的所在。
12:5 伊若生查某子，就無清氣二個七日，親像佇經期的時一樣，若猶流血，著踮佇伊的厝六十六日才清氣。
12:6 「佇伊清氣的日滿，無論是為查甫子抑是查某子，伊著用未滿年的羊仔做燒祭，一隻鴿仔子抑是一隻鳩鵻做贖罪祭，帶到會幕門口交代祭司。
12:7 祭司著獻佇耶和華的面前，為伊贖罪，伊的血源就清氣。這就是婦仁人生查甫子抑是生查某子的規例。
12:8 伊的氣力若無夠額通獻一隻羊仔，伊就著用二隻鳩鵻抑是二隻鴿仔子，一隻做燒祭，一隻做贖罪祭。祭司著替伊贖罪，伊就清氣。」