11:1 基列人耶弗他是一個大權能的勇士，是妓女的子。耶弗他是基列所生的。
11:2 基列的某也給伊生幾若個子：伊的某所生的子已經大漢，就革逐耶弗他，給伊講：「你呣通佇阮老父的家承接業，因為你是別個婦仁人的子。」
11:3 耶弗他就走閃避伊的兄弟，去踮佇陀伯的地，有匪類聚集佇耶弗他遐，隨伊出入。
11:4 過有許久，亞捫人及以色列交戰。
11:5 亞捫人及以色列交戰的時，基列的長老去，欲招耶弗他對陀伯的地來；
11:6 對耶弗他講：「請你來做阮的元帥，阮就通及亞捫人交戰。」
11:7 耶弗他應基列的長老講：「前恁豈呣是怨恨我、趕我出老父的家嗎？今恁抵著患難啥事來我遮啊？」
11:8 基列的長老應耶弗他講：「阮今所以歸向你，是愛你及阮去，及亞捫人交戰；你通做阮的頭來管轄基列一切徛起的百姓。」
11:9 耶弗他對基列的長老講：「恁導我倒去，及亞捫人交戰，耶和華將交佇我的面前，我真正欲做恁的頭嗎？」
11:10 基列的長老應耶弗他講：「耶和華佇咱中間做干證，阮的確照你的話行。」
11:11 耶弗他就及基列的長老倒去，百姓就立伊做頭、做元帥。耶弗他佇米斯巴將家己一切的話排列佇耶和華的面前。
11:12 耶弗他差許個使者去見亞捫人的王，講：「你及我甚麼干涉，竟然來我遮攻擊我的地啊？」
11:13 亞捫人的王應耶弗他的使者講：「因為以色列人對埃及上來的時佔我的地，對亞嫩到雅博，直到約但。今恁著願願將諸個地還我！」
11:14 耶弗他閣差使者去見亞捫人的王，
11:15 給伊講：「耶弗他按呢講，以色列人並無佔摩押地及亞捫人的地。
11:16 以色列人對埃及上來經過曠野到紅海，來到加低斯，
11:17 彼時以色列就差使者去見以東王，講：『求你准阮經過你的地。』總是以東王呣聽伊。閣差使者去見摩押王，伊也呣准。以色列人就踮佇加低斯。
11:18 閣經過曠野，踅以東地及摩押地，對摩押地的東勢過來，佇亞嫩彼旁紮營，也無入摩押的境內，因為亞嫩河是摩押的交界。
11:19 以色列差人去見亞摩利王西宏，就是希實本的王，以色列對伊講：『求你准阮過你的地，去阮家己的所在。』
11:20 總是西宏呣信以色列，呣互經過伊的境界，西宏就聚集伊的眾百姓佇雅雜紮營，及以色列人交戰。
11:21 耶和華──以色列的上帝用西宏及伊的眾百姓交佇以色列人的手，就拍，對按呢以色列就得著彼所在徛起的亞摩利人全地；
11:22 得著亞摩利人的全境界，對亞嫩到雅博，對曠野到約但。
11:23 耶和華──以色列的上帝佇伊百姓以色列的面前趕出亞摩利人，你也欲得著的地嗎？
11:24 你的上帝基抹所賞賜你得著的你無得著伊來做業嗎？耶和華──阮的上帝見若對阮的面前所趕出的，阮欲得著伊。
11:25 你豈贏過摩押王西撥的子巴勒嗎？伊豈曾及以色列人計較嗎？豈曾及交戰嗎？
11:26 以色列人踮佇希實本及伊的鄉社，亞羅珥及伊的鄉社，及亞嫩河邊許個城，已經有三百年；恁佇彼時啥事無取倒轉啊？
11:27 我無得罪你，你反轉及我交戰，實在無理。願審判的耶和華今仔日佇以色列及亞捫的中間來判斷。」
11:28 總是亞捫人的王呣肯聽耶弗他差人對伊講的話。
11:29 耶和華的神臨到耶弗他，伊就經過基列及瑪拿西，閣經過到基列的米斯巴，閣對基列的米斯巴經過到亞捫人遐。
11:30 耶弗他就對耶和華下願，講：「你若將亞捫人交佇我的手，
11:31 我對亞捫人遐平安倒來的時，見若對我的厝的門出來迎接我的，欲歸佇耶和華，我欲獻伊做燒祭。」
11:32 對按呢耶弗他去亞捫人遐，及交戰；耶和華將交佇伊的手，
11:33 伊就拍大大死，對亞羅珥到米匿，直到亞備勒基拉明，共二十個城。按呢亞捫人就屈服佇以色列人。
11:34 耶弗他倒來米斯巴到家己的厝，彼時，伊的查某子抬鈴瓏鼓跳舞出來迎接伊，此個是伊獨生的，以外無子無查某子。
11:35 耶弗他看見伊，就拆裂衫講：「唉啊，我的查某子，你互我真慘，你也是互我真大艱難；因為我已經對耶和華開嘴，會收倒轉。」
11:36 伊應講：「我的父啊，你已經對耶和華開嘴，就著照你的嘴所講出的行佇我，因為耶和華已經為著你報仇你的對敵亞捫人」；
11:37 閣對伊的老父講：「有一件事求你允准：容允我二月日，互我及我的同伴去山裡，通啼哭我做在室女。」
11:38 伊講：「你去啊！」就差伊去二月日。伊及同伴去，佇山裡為著伊做在室女啼哭。
11:39 二月日已經滿，伊倒來到老父遐，老父就照伊所下的願款待伊。伊攏無親近查甫人。
11:40 後來以色列中有此個例，逐年以色列諸個查某囝仔去追悼基列人耶弗他的查某子每年四日。