47:1 法老攻擊迦薩的代先，有耶和華論非利士人的話臨到先知耶利米。
47:2 耶和華按呢講：看啊，有水對北方淐起來，成做漲滿的河，欲漲滿此個地及其中所有的，及城及其中所徛起的。人欲喉叫；境內徛起的百姓欲啼哭。
47:3 為著對敵勇的馬，伊的蹄硞硞哮的聲也為著伊許個戰車緊緊走，伊的車輪呼呼哮，就諸個做老父的手軟，無越頭看伊的子。
47:4 因為時日到了，欲毀滅一切的非利士人，欲對推羅、西頓剪除所剩幫助者。因為耶和華欲毀滅非利士人，迦斐託海嶼所剩的百姓。
47:5 迦薩已經無半支頭毛；亞實基倫歸佇無，山谷所剩者，你家己割肉，欲到偌久啊？
47:6 耶和華的刀劍啊，你欲到底時才息？著勼入你的刀鞘，安靜無振動。
47:7 耶和華已經命令你攻擊亞實基倫攻擊海邊的地，伊已經派你定著，你豈可會停止啊？