42:1 眾軍長及加利亞的子約哈難，及何沙雅的子耶撒尼亞以及眾百姓，對細到大攏進前來，
42:2 對先知耶利米講：「求你准阮佇你的面前所求，替阮諸個剩的人祈禱耶和華──你的上帝。阮本然真多，今所剩的真少，這是你親目看見的。
42:3 願耶和華──你的上帝指示阮所著行的路，所著做的事。」
42:4 先知耶利米給講：「我已經聽見，好，我欲照恁的話祈禱耶和華──恁的上帝。無論耶和華應恁甚麼，我的確攏欲給恁講，無對恁囥密一句。」
42:5 對按呢給耶利米講：「阮若無照耶和華──你的上帝差你來講一切的話去行，就願耶和華佇你阮的中間做真實忠信的干證。
42:6 阮此時請你到耶和華──阮的上帝的面前，伊所講的無論是好是歹，阮攏欲聽趁伊的話；阮聽趁耶和華阮的上帝的話，就通得著亨通。」
42:7 過十日，有耶和華的話臨到耶利米。
42:8 伊就將加利亞的子約哈難以及及伊相及佇的眾軍長，及眾百姓，對細到大攏叫來，
42:9 對講：「耶和華──以色列的上帝，就是恁差我到伊的面前來獻恁所求的，伊按呢講：
42:10 『恁若猶原欲踮佇此所在，我就欲建造恁，無毀壞恁，欲栽培恁，無拔出恁，因為我有退悔我所降互恁的災禍。
42:11 莫得驚恁所驚的巴比倫王。』」耶和華講：「莫得驚伊！因為我及恁佇，欲拯救恁互恁脫離伊的手。
42:12 我欲憐憫恁，互亦憐憫恁，互恁倒來本所在。
42:13 設使恁講：『阮呣踮此所在』，按呢就是恁呣聽趁耶和華──恁的上帝的話，
42:14 若講：『呣啊，阮欲入去埃及地，佇遐無看見交戰，無聽見哨角的聲，亦不致無通食來枵餓。阮欲住遐徛起。』
42:15 今恁猶大所剩的百姓啊，著聽耶和華的話。萬軍的耶和華──以色列的上帝按呢講：『恁若竟然硬鼻欲去埃及，住遐寄腳，
42:16 就恁所驚的刀劍欲佇遐著恁佇埃及地！閣恁所驚的飢荒欲佇埃及地給恁隨住住！恁欲死佇遐！
42:17 見若硬鼻欲去埃及寄腳佇遐的人攏欲按呢，欲對刀劍、對飢荒、對瘟疫來死，其中無一個留，亦無一個脫離我所降互恁的災禍。』
42:18 「因為萬軍的耶和華──以色列的上帝按呢講：『我有怎樣將我的受氣及大受氣傾佇耶路撒冷徛起的百姓，恁去埃及的時，我亦欲照按呢將我的大受氣傾佇恁的身上，互恁成做通咒詛、通卬愕、通詈罵、通凌辱，恁亦無閣看見此個所在。』
42:19 恁猶大所剩的百姓啊，耶和華論到恁有講：『莫得去埃及。』恁著確實知我今仔日有證明勸誡恁啦。
42:20 恁行差謬連累家己；因為恁差我到耶和華──恁的上帝遐，講：『求你替阮祈禱耶和華──咱的上帝，照耶和華──咱的上帝一切所講的給阮講，阮欲行伊。』
42:21 我今仔日有給恁講啦，若是恁的上帝──耶和華的聲及伊差我一切指示恁的，恁攏無遵趁。
42:22 今恁著確實知，恁佇所欲去寄腳的地欲對刀劍、對飢荒、對瘟疫來死。」