2:1 耶和華的話閣臨到我講：
2:2 你去向耶路撒冷人的耳孔叫講，耶和華按呢講：你少年的恩愛，婚姻的愛情，你怎仔樣佇曠野，佇未曾種作的地跟隨我，我攏給你記得。
2:3 彼時以色列做聖歸耶和華，做伊起頭熟的土產；見若吞食伊的欲算做有罪，災禍欲臨到。這是耶和華講的。
2:4 雅各的家啊，以色列家的逐房頭啊，恁著聽耶和華的話。
2:5 耶和華按呢講：恁的列祖看我有甚麼不義，竟然離開我遠遠，去趁許個虛假者，來做虛假者啊？
2:6 亦無講：彼個導咱出埃及地的耶和華佇叨落？伊是導咱經過曠野，沙漠及深坑的所在，亢旱、死蔭的地、無人經過，無人徛起的境界。
2:7 我導恁入肥的地，互恁食彼中間的果子及好物；總是恁入來了就拍垃墋我的地，互我的產業成做可惡的。
2:8 祭司攏無講，耶和華佇叨落咧？講解律法的呣識我。官長悖謬我；先知靠巴力來讖語，閣趁無利益的事。
2:9 耶和華講：我因為按呢欲及恁爭辯，亦欲及恁的子子孫孫爭辯。
2:10 恁著過去基提諸個海嶼來觀看，差人去基達留心查考，看曾有此號事抑無。
2:11 豈有一國改換的上帝嗎？其實許個呣是上帝！總是我的百姓將的榮光來換彼個無利益的。
2:12 諸個天啊，著因為此個來卬愕，極其驚惶，盡在冷靜！這是耶和華講的。
2:13 因為我的百姓做二項歹代，就是我做活水的源頭，離開我，閣為家己開池，是破裂貯水的池。
2:14 以色列是奴僕嗎？是家中生的奴僕嗎？為何成做受搶的物啊？
2:15 勇的獅向伊噤噤哮，出大聲，互伊的地拋荒；城亦攏燒毀，無人徛起。
2:16 羅弗人及答比匿人亦拍碎你的頭殼頂。
2:17 此個事豈呣是你家己取的嗎？因為你的上帝──耶和華導你行路的時，你有棄拺伊。
2:18 今你啥事佇埃及的路，是欲飲西曷的水嗎？你啥事佇亞述的路，是欲飲大河的水嗎？
2:19 你家己的歹欲警戒你；你悖逆的事欲責備你。對按呢通知，通看出，你棄拺你的上帝──耶和華，無存敬畏我的心，就是歹，閣艱苦的事。這是主──萬軍的耶和華講的。
2:20 我佇古早的時遏折你的軛，解開你的索。你講：我呣順服；因為你佇逐個高山頂、逐欉青翠的樹腳屈落身軀行淫。
2:21 若是我曾栽種你，是上等的葡萄樹，全然是真的種子；你對佇我怎樣變做別款葡萄樹的歹枝啊？
2:22 你雖莽用鹼、用多多雪文來洗，你的罪惡的痕跡猶原顯出佇我的面前。這是主耶和華講的。
2:23 你豈可會講：我無染著垃墋、無隨諸個巴力啊？你看你山谷中的路，就知你所行的怎樣。你是單陵走的駱駝，走來走去。
2:24 你是野驢，慣勢佇曠野，慾心發動就吸風； 的時是誰會阻止伊啊？誚見若尋伊的呣免著磨；佇伊彼月，的確會尋著。
2:25 你著禁止你的腳，免致無鞋，禁止你的嚨喉，免致嘴乾。總是你講：這是無採工，呣啊。我已經戀慕別個，我欲隨。
2:26 賊互人掠著，怎樣見誚，以色列家及的君王、貴族、祭司、先知亦攏按呢見誚。
2:27 對柴頭講：你是我的父；對石頭講：你是生我的。用尻脊向我，無用面向我；到抵著患難的時才講：起來，來救阮。
2:28 你為家己所造的上帝佇叨落？伊若會救你佇你抵著患難的時，就著起來救你！猶大啊，你的上帝的數額及你的城的數額平平多。
2:29 耶和華講：恁啥事及我爭辯？恁攏悖逆我。
2:30 我督責恁的子兒是空空，無受警戒。恁的刀，親像猛獅吞咬恁的先知。
2:31 此世代啊，恁著明耶和華的話。我對佇以色列豈曾做親像曠野？抑是曾做親像黑暗的地啊？我的百姓啥事講：阮脫離約束，呣閣歸向你啦？
2:32 在室女豈會記得伊的妝飾嗎？新娘豈會記得伊的娞衫？總是我的百姓記得我算得日！
2:33 你怎樣修整你的路，要求寵愛？連歹婦仁人，你亦用你的路教示。
2:34 閣你的衫仔裾有無罪的喪鄉人的血；呣是佇挖厝孔的所在抵著，是佇逐所在攏有。
2:35 你猶久講：我無罪；耶和華的受氣的確越轉離開我。看啊，我欲審問你；因為你家己講：我無犯罪。
2:36 你啥事走東走西，欲改換你的路啊？你欲因為埃及來見誚，親像前因為亞述來見誚一樣。
2:37 你亦欲雙手抱頭殼，對遐出來；因為耶和華已經棄絕你所倚靠者，你亦對得著亨通。