35:1 上帝給雅各講：「去啊！上去伯特利，住佇遐；閣著佇遐給上帝起一座壇，就是你閃避你的兄以掃的面的時對你出現的彼個。」
35:2 雅各就給全家以及一切及伊佇的人講：「恁著除去恁中間外邦的上帝，亦著家己清氣，換恁的衣裳。
35:3 恁著起來，上去伯特利，佇遐我欲給上帝起一座壇，就是佇我抵著患難的日允准我的祈禱、佇我所行的路及我佇彼個。」
35:4 就將手內所有異邦的神明及的耳攏互雅各；雅各將許個埋佇示劍彼位的橡樹腳。
35:5 就起身。上帝互四周圍的城的人攏真驚，就無追雅各的眾子。
35:6 雅各以及一切及伊做陣的人到迦南地的路斯，就是伯特利。
35:7 伊佇遐起一座壇，就給彼所在號名叫伊勒伯特利；因為伊閃避伊的兄的時，上帝佇遐對伊出現。
35:8 利百加的奶母底波拉死，就埋葬佇伯特利的下面橡樹腳；所以叫伊的名亞倫巴古。
35:9 雅各對巴旦亞蘭倒來，上帝閣對伊出現，賜福互伊，
35:10 上帝閣給伊講：「你名是雅各，今以後你的名無閣叫雅各，欲名叫以色列。」就叫伊的名以色列。
35:11 上帝閣給伊講：「我是全能的上帝；你著生湠多多，將來有一國閣有多多國對你來生，閣有君王對你生出。
35:12 我所互亞伯拉罕及以撒的地，我欲互你亦欲將此個地互你的後裔。」
35:13 上帝就對及伊講話的所在上去。
35:14 雅各就佇上帝及伊講話的所在徛一支柱，就是石柱，佇彼頂面灌奠，倒油。
35:15 雅各就稱上帝及伊講話的所在名做伯特利。
35:16 對伯特利起身，離開以法他猶有一站的路，拉結得欲生，臨產艱難。
35:17 當伊艱苦生的時，拾姐對伊講：「呣免驚，你今欲閣得著一個子。」
35:18 伊氣欲斷臨終的時，就叫伊的子的名便俄尼；伊的老父給伊號名便雅憫。
35:19 拉結死，埋葬佇去以法他的路；以法他就是伯利恆。
35:20 雅各徛柱佇伊的墓頂，此個柱就是拉結的墓牌，到今仔日猶佇。
35:21 以色列閣起身去，佇以得台搭布棚。
35:22 以色列住佇彼所在的時，流便去及伊的老父的細姨辟拉相及睏，以色列亦聽。雅各共有十二個子。
35:23 利亞的子就是雅各的大子流便，以及西緬、利未、猶大、以薩迦、西布倫。
35:24 拉結的子就是約瑟、便雅憫。
35:25 拉結的女婢辟拉所生的子就是但及拿弗他利。
35:26 利亞的女婢悉帕所生的子迦得、亞設。這是雅各佇巴旦亞蘭所生的子。
35:27 雅各來見伊的老父以撒，佇幔利到基列亞巴，就是希伯崙；亞伯拉罕及以撒曾寄居的所在。
35:28 以撒享壽一百八十歲。以撒年歲老，日子滿足，氣斷來死，倒去伊的列祖遐。伊二個子以掃、雅各給伊埋葬。
35:29 本版無此節。