14:1 當暗拉非做示拿王，亞略做以拉撒王，基大老瑪做以攔王，提達做戈印王的時，
14:2 來攻擊所多瑪王比拉、蛾摩拉王比沙、押瑪王示納、洗扁王施米別，以及比拉王；比拉就是瑣珥。
14:3 攏聚會佇西訂的山谷；西訂山谷就是鹽海。
14:4 服事基大老瑪十二年久，到十三年背叛。
14:5 十四年，基大老瑪及同會盟諸個王攏來佇亞特律加寧，贏利乏音人，佇涵蘇西人，佇沙微基列亭以米人，
14:6 佇何利人的西珥山何利人，到近佇曠野的伊勒巴蘭。
14:7 倒轉到安密巴，就是加低斯，攻擊亞瑪力全地，及徛起佇哈洗遜他瑪的亞摩利人。
14:8 對彼霎所多瑪王、蛾摩拉王、押瑪王、洗扁王、比拉王（比拉就是瑣珥）攏出來，佇西訂的山谷排陣，及交戰，
14:9 就是及以攔王基大老瑪、戈印王提達、示拿王暗拉非、以拉撒王亞略交戰；四個王對敵五個王。
14:10 西訂山谷攏是石油坑。所多瑪蛾摩拉諸個王逃走，跋佇遐，其餘的走上山。
14:11 就將所多瑪蛾摩拉的財物，以及的乾糧攏搶做去；
14:12 閣將亞伯蘭的姪羅得及伊的財物搶去。彼時羅得住佇所多瑪。
14:13 有一個逃走的人來給希伯來人亞伯蘭講；彼時亞伯蘭徛起佇亞摩利人幔利的橡樹彼所在。幔利及以實各及亞乃攏是兄弟，有及亞伯蘭聯盟。
14:14 亞伯蘭聽見伊的姪互人掠去，就導生養佇伊的家裡精練的壯丁三百十八人，追到但，
14:15 伊及伊的奴僕透暝分隊攻擊，追到大馬色倒旁的何巴，
14:16 將一切的財物搶倒轉，連伊的姪仔羅得及伊的財物，以及婦女、百姓亦攏搶倒轉。
14:17 亞伯蘭贏基大老瑪以及及伊做陣諸個王倒來的時，所多瑪王出來，到沙微的山谷迎接伊；沙微的山谷就是王的山谷。
14:18 亦有撒冷王麥基洗德帶餅及酒出來；伊是至高上帝的祭司。
14:19 祝福伊，講：「願天地的主、至高的上帝賜福亞伯蘭！
14:20 至高的上帝將對敵交佇你的手，應該謳咾伊！」亞伯蘭將攏總所得著的十份提一份互伊。
14:21 所多瑪王給亞伯蘭講：「將人歸我，物攏互你！」
14:22 亞伯蘭給所多瑪王講：「我有指天地的主──至高的上帝耶和華來咒誓：
14:23 凡若你的物，就一條線、一條鞋帶，我攏呣提，免得你講：『我互亞伯蘭好額！』
14:24 只有少年人所食的，以及及我同行的人亞乃、以實各、幔利所應得的份額，通出在提。」