8:1 第六年六月初五，我坐佇我的厝內；猶大諸個長老坐佇我的面前。佇遐主耶和華的手到佇我的身上。
8:2 我觀看，看見有形像親像火的款式，對伊的腰以下的款式有火，對伊的腰以上的光光的款式，親像琥珀的色緻。
8:3 伊伸出親像一支手的款，住我一股的頭毛，神就將我舉起到天及地的中間，佇上帝的異象中，帶我到耶路撒冷向北內院的門口，佇遐有妒忌的偶像的座位，就是激動妒忌的。
8:4 看啊，佇遐有以色列上帝的榮光，款式及我佇平洋所看見者一樣。
8:5 伊對我講：「人子啊，你抬目向北方的路觀看。」我就抬目向北方的路觀看，看啊，佇祭壇門的北勢，佇門口有一個激動妒忌的偶像；
8:6 伊閣對我講：「人子啊，你看見所做的嗎？就是以色列家佇遮所行大可惡的事，互我離開我的聖所遠遠。總是你欲閣看，猶有閣卡大可惡的事。」
8:7 伊導我到院的門。我觀看，看見牆壁有一孔。
8:8 伊對我講：「人子啊，你著挖牆。」我一下挖牆，看見有一個門。
8:9 伊給我講：「你入去，看佇此內面所行可惡的歹代。」
8:10 我就入去看，看啊，佇四面的牆壁畫逐號會趖的物及可惡的走獸，及以色列家一切的偶像。
8:11 佇諸個像的面前，有以色列家七十個長老徛，沙番的子雅撒尼亞也徛佇中間。逐人手提香爐，香煙的芳味淐上高。
8:12 伊對我講：「人子啊，以色列家的長老佇暗中佇逐人畫像的房仔內所行的，你看見無？因為講：『耶和華無看見阮；耶和華已經離開此個地。』」
8:13 伊閣對我講：「你欲閣看見所行猶有閣卡大可惡的事。」
8:14 伊導我到耶和華的厝，向北的門口。看啊，佇遐有婦女坐，為著搭模斯啼哭。
8:15 伊對我講：「人子啊，你看見無？你猶欲看見比這閣卡可惡的事。」
8:16 伊閣導我到耶和華厝的內院。看啊，佇耶和華的殿門、兩廊及祭壇的中間，約略有二十五人尻脊向耶和華的殿，面向東，也向東拜日頭。
8:17 伊對我講：「人子啊，你有看見無？猶大家佇遮行此個可惡的事猶算做小可嗎？佇此個所在遍行強暴，再三激我的受氣，看啊，抬樹枝下佇的鼻前。
8:18 因為按呢，我亦欲行我的大受氣，我的目睭無欲疼惜，我也無欲可憐；雖然向我的耳孔中大聲求叫，我猶原呣聽。」