17:1 以色列人全會趁耶和華的命令，照路站對汛的曠野進前行，佇利非訂紮營。百姓無水通飲，
17:2 百姓就及摩西計較，講：「互阮有水通飲！」摩西給講：「恁啥事及我計較？啥事試耶和華啊？」
17:3 百姓佇遐真嘴乾，愛飲水，就哀怨摩西，講：「你啥事導阮對埃及上來，互阮及阮的子兒，阮的精牲攏嘴乾死啊？」
17:4 摩西就求叫耶和華講：「我對此個百姓欲怎樣做啊？差不多欲用石頭擲我。」
17:5 耶和華給摩西講：「你做百姓的頭前行，，導以色列的長老幾若人及你去，你的手著抬前日拍河水的柺仔。
17:6 看啊，我欲徛佇你的面前，佇何烈的石磐頂。你拍彼個石磐，欲有水對遐流出，互百姓飲。」摩西就佇以色列長老的面前按呢行。
17:7 伊名彼個所在叫瑪撒，閣叫做米利巴；因為以色列人計較，閣因為試耶和華，講：「耶和華佇阮中間抑無？」
17:8 彼時，亞瑪力人來到利非訂，及以色列人交戰。
17:9 摩西給約書亞講：「你替咱揀人出去，及亞瑪力人交戰。明仔日我手裡欲抬上帝的柺仔，徛佇山頂。」
17:10 對彼霎約書亞照摩西所給伊講的行，及亞瑪力人交戰。摩西、亞倫，及戶珥攏上山頂。
17:11 摩西手抬起的時，以色列人就卡贏，手垂落去的時，亞瑪力人就卡贏。
17:12 總是摩西手酸，就徙石，來下佇伊的下面，伊坐佇石頂。亞倫及戶珥扶伊的手，一個佇此旁，一個佇彼旁，伊的手就自在，直直到日落。
17:13 約書亞用刀亞瑪力王及伊的百姓。
17:14 耶和華給摩西講：「我欲將亞瑪力的名字對天下完全擦滅伊；你著用此個寫佇冊裡做紀念，閣講互約書亞聽。」
17:15 摩西起一座壇，號伊的名叫「耶和華尼西」，
17:16 閣講：「耶和華已經咒誓，耶和華欲代代及亞瑪力人交戰。」