15:1 咱諸個會的人應該著擔代的人的軟弱，呣通求家己的歡喜。
15:2 咱逐人著互厝邊歡喜，互得著好來建立。
15:3 因為基督也無求家己的歡喜，就是照所記載講：「人詈罵你的詈罵有到佇我。」
15:4 因為早所記載的攏是欲教示咱才來記，互咱對吞，對聖經的安慰來得著向望。
15:5 願賞賜吞 安慰的上帝互恁大家同心志，照基督耶穌，
15:6 互恁一樣心一樣嘴榮光上帝──就是咱的主耶穌基督的父。
15:7 所以，著相接納，親像基督也有接納恁，致到榮光歸佇上帝。
15:8 因為我講，基督為著上帝的真實曾做奉割禮的人的差用，欲堅固所應允列祖的，
15:9 也互外邦人為著憐憫歸榮光上帝。照所記載講：因為按呢我佇外邦中欲稱呼你，唱歌謳咾你的名；
15:10 閣講：恁外邦人著及伊的百姓同歡喜。
15:11 又閣講：恁眾外邦著稱讚主！恁萬百姓著謳咾伊！
15:12 又閣以賽亞講：欲有耶西的根頭，及興起來治理外邦的；外邦欲倚靠伊來有向望。
15:13 願賞賜向望的上帝，互恁對信來充滿逐樣的歡喜、平安，互恁佇聖神的權能得著滿滿的向望。
15:14 我的兄弟啊，我家己也深信恁滿滿善良，充足逐樣的智識，也會大家相勸勉。
15:15 總是我寫批互恁有淡薄卡好膽，欲互恁閣會記得，這是對上帝所互我的恩典，
15:16 互我佇外邦做基督耶穌的執事，用上帝的福音來服事，欲互所獻的外邦人，佇聖神成聖的得著接納。
15:17 所以論上帝的事，我佇基督耶穌有通誇口。
15:18 因為除基督用我所行的以外，我呣敢講甚麼，只有講伊用我的言語及行做，佇神蹟及奇事的權能，及佇聖神的權能，互外邦順服；
15:19 按呢我對耶路撒冷踅到以利哩古，遍傳基督的福音。
15:20 閣我立志傳福音無佇基督已經受稱呼的所在，驚了起佇別人的地基頂。
15:21 就是照所記載講：未得著伊的消息的，欲看見；未聽見的，欲曉悟。
15:22 因為按呢我多多擺抵著阻擋，得通就近恁。
15:23 若是現今，佇諸個地方無閣有所在通去，已經多多年有欣慕欲就近恁，聽候我去士斑雅的時，
15:24 因為我向望經過的時，見著恁，代先及恁交陪略略仔滿意，後來得著恁送行去遐。
15:25 總是現在，我去耶路撒冷供給聖徒。
15:26 因為馬其頓、亞該亞人歡喜相及兌捐幫助耶路撒冷聖徒中的喪鄉人。
15:27 真正是歡喜，卻也是欠的債；因為外邦人既然相及有份佇神靈的事，自然著用肉體的物服事。
15:28 聽候我做完此個事，將此個捐項交付明白，我欲對恁遐去士斑雅。
15:29 我也知就近恁的時，欲有基督豐盛的祝福順續去。
15:30 兄弟啊，我對咱的主耶穌基督，也對聖神的疼，勸恁及我同盡力，替我祈求上帝，
15:31 救我脫離猶太地許個呣順服的人，也互我為著耶路撒冷所做供給的事得著聖徒接納，
15:32 互我對上帝的旨意到恁遐有歡喜，也及恁相及得著安息。
15:33 願賞賜平安的上帝及恁眾人佇。阿們！