12:1 兄弟啊，所以我因為上帝的憐憫勸恁獻家己的身軀做祭，是活的，聖的，上帝所歡喜的；這是恁神靈的服事。
12:2 莫得及此世間像款，著用心志換新來變化家己，互恁會明白甚麼是上帝善良、通歡喜、純全的旨意。
12:3 因為我對所互我的恩給恁中間逐人講，恁所想來忖 家己，呣通過佇應該想的；所想著安份來想，照上帝所賞賜逐人信的份量。
12:4 因為親像咱一身有百體，若是百體的功用無攏相同；
12:5 按呢咱多多人佇基督做一身，逐個相共做體。
12:6 咱照所互咱的恩，已經得著恩賜，各無相同。或是做先知，就著照信的份量來講，
12:7 或是辦代誌，著致意佇辦代誌；或是教示人的，著致意佇教示；
12:8 或是勸勉的，著致意佇勸勉；賙助的，著用實心；治理的，著用殷勤；憐憫的，著用歡喜。
12:9 疼著無假；怨恨歹，親近好。
12:10 疼兄弟，著相親愛；敬重人，著相推尊。
12:11 論殷勤，呣通貧憚。論心志著熱熱，論主著服事。
12:12 佇向望著歡喜，佇患難著吞，佇祈禱著常常。
12:13 聖徒所欠缺的就供給伊；出外人著致意好款待。
12:14 窘逐恁的，著給祝福；著祝福，莫得咒詛。
12:15 及歡喜的人相及歡喜；及啼哭的人相及啼哭。
12:16 相款待著同一樣的心；心志莫得好高，著促就卑微的；莫得掠家己做有智識。
12:17 莫得用歹報歹；佇眾人的面前著圖謀諸個好事。
12:18 若會得通及眾人和，就著盡力及和。
12:19 所疼的兄弟啊，莫得家己伸冤，著 氣卡好；因為有記載講：「主講：『伸冤在佇我，我欲報應伊。』
12:20 若是你的對敵枵，著互伊食，嘴乾，著互伊飲；因為行按呢是將熱熱的火炭疊佇伊的頭殼頂。」
12:21 莫得互歹卡贏，著用好卡贏歹。