9:1 智慧有起伊的厝，有拍伊七支柱，
9:2 有伊的精牲，有調和伊的酒，有辦伊的筵桌；
9:3 差伊的女婢出去，家己佇城內極高的所在叫，
9:4 講：見若戇直的人，著越來遮！閣給無知的人講：
9:5 恁來，食我的餅，飲我調和的酒。
9:6 恁棄拺愚戇，就得著活，也著行光明的路。
9:7 規正侮慢的人，家己招凌辱；責備歹人者，家己取見誚。
9:8 呣通責備侮慢的人，驚了伊怨恨你；著責備智慧的人，伊欲疼你。
9:9 教示智慧的人，伊就益發有智慧；指示義人，伊就加添學問。
9:10 敬畏耶和華是智慧的根本；識彼位聖者就是聰明。
9:11 因為對我，你的日子欲卡多，你的年歲也愈欲加添。
9:12 你若做智慧，就是為著本身做智慧；你若侮慢，就欲家己擔當。
9:13 愚戇的婦仁人嚷；伊是戇直，呣識半項。
9:14 伊坐佇伊家己的門口，坐佇城內高地的座位，
9:15 愛叫過路的人，就是直直行的路的人，
9:16 講：見若戇直的人著越來遮！閣給無知的人講：
9:17 偷舀來的水是甜的，偷食的餅是有滋味的。
9:18 總是彼號人呣知佇伊遐的是陰魂；伊的人客佇陰府深的所在。