5:1 我的子，著留心佇我的智慧，俯耳孔聽我的聰明的話，
5:2 為著欲互你執守計劃，嘴唇保存知識。
5:3 因為淫婦的嘴唇滴落甜蜜；伊的嘴比油卡滑，
5:4 到尾就苦親像茵蔯，利親像雙面的劍。
5:5 伊的腳落到死地；伊的腳步踏著陰府，
5:6 致到活命平坦的路伊尋著。伊的路無定著，伊也呣知。
5:7 我諸個子啊，今著聽趁我；呣通離開我所講的話。
5:8 你的路著離開伊遠遠，呣通行近伊的門口，
5:9 驚了你將家己的榮光互別人，將你的歲壽互殘忍的人；
5:10 驚了外人得著你的錢財滿滿，你著磨得著的，歸佇外人的家；
5:11 到尾，你的肉體衰敗，你就悲哀吐氣，
5:12 就講：嗐啊，我怎樣怨恨教示，心內藐視責備；
5:13 亦無聽趁我的先生的話，閣無俯耳孔聽許個教示我的人？
5:14 我佇會眾及大會中，險險陷落佇逐號的歹。
5:15 你著飲家己水池內的水，飲家己井內所出的水。
5:16 你的水泉豈通滿出外面？你的溪水豈通流佇街路？
5:17 獨獨歸你一人，呣通及別人相及用。
5:18 著互你的水泉得著福氣；著歡喜你少年的時所娶的某。
5:19 伊親像通疼的鹿母，通歡喜的鹿母；伊的胸前互你時時知足，伊的愛情互你常常戀慕。
5:20 我的子，你啥事戀慕淫婦？啥事抱妓女的胸前？
5:21 因為，人所行的路攏佇耶和華的目睭前；伊也修平人一切的路。
5:22 歹人欲互家己的罪過擒著；伊欲互伊罪惡的索縛。
5:23 伊因為欠缺教示欲致到死無；閣因為愚戇到極，欲行差路。