3:1 我的子，呣通記得我的教示；你的心著執守我的誡命；
3:2 因為許個欲將久長的日子，長的歲壽及平安，加添互你。
3:3 呣通互慈愛、誠實離開你，著縛佇你的頷頸，刻佇你的心碑。
3:4 按呢，你欲佇上帝及人的面前得著恩典及好名聲。
3:5 你著專心倚靠耶和華，呣通倚靠你家己的，
3:6 佇你一切所行的事攏著認伊，伊欲指點你的路。
3:7 呣通家己看做智慧；著敬畏耶和華，離開歹事。
3:8 這會互你的身體勇健，潤澤你的筋骨。
3:9 著用你的財物及你一切起頭熟的土產尊敬耶和華。
3:10 按呢，你的粟倉欲淀滿滿，你的酒窟欲有新酒滿出來。
3:11 我的子，呣通看輕耶和華的警戒，亦呣通厭賤伊的責備；
3:12 因為耶和華責備伊所疼者，親像老父責備伊所歡喜的子。
3:13 得著智慧者，得著聰明，此號人有福氣。
3:14 因為得著伊贏過得著銀，伊的得利卡贏好金，
3:15 比紅寶石卡貴氣；你所欣慕的，無一項會比得伊。
3:16 伊的正手有長歲壽，伊的倒手有好額及尊貴。
3:17 伊的路是快樂的路；伊的路徑攏是平安。
3:18 對佇持守伊的人，是做活命樹；擒住伊的，逐個有福氣。
3:19 耶和華用智慧建立地，用聰明安置天，
3:20 用伊的智識互深淵裂開，穹蒼落露水。
3:21 我的子，著執守真的智慧及計劃，呣通互離開你的目睭。
3:22 按呢，欲佇你的靈魂做活命；佇你的頷頸做娞的妝飾。
3:23 你就欲安然行你的路，你的腳亦無著觸。
3:24 你倒，的確無驚；你倒，欲真好睏。
3:25 忽然來的驚惶，你呣免驚；歹人所抵著的敗壞，你也呣免驚。
3:26 因為耶和華欲做你所倚靠者；伊欲保守你的腳無陷落羅網。
3:27 你的手若有行好的氣力，呣通推辭，就著提互彼個應該得著的人。
3:28 你若有便，呣通對你的厝邊講：請去，明仔日閣來，我欲互你。
3:29 你的厝邊佇你的附近安然徛起，你呣通設計謀害伊。
3:30 人呣曾陷害你，你呣通無因端及伊冤家。
3:31 呣通欣羨強暴的人，亦呣通揀伊所行的路。
3:32 因為，橫逆的人是耶和華所厭惡；正直的人伊及伊親密。
3:33 耶和華的咒詛到佇歹人的家，若是好人的厝伊賞賜福氣互伊。
3:34 侮慢人的，伊侮慢伊，施恩互謙卑的人。
3:35 智慧的人欲承接榮光；愚戇的人升高也成做見誚。