26:1 夏天落雪，收割的時落雨，攏呣合宜；愚戇的人得著榮光也是按呢。
26:2 雀鳥仔往來，燕仔飛來飛去；按呢無緣故的咒詛也應驗。
26:3 鞭是為著馬，咬韁是為著驢；枴仔是為著戇人的尻脊。
26:4 呣通照戇人的戇來應伊，驚了你及伊一樣
26:5 著照戇人的戇來應伊，驚了伊家己看做智識。
26:6 託戇人報消息的，是剉斷家己的腳，家己食虧。
26:7 箴言佇戇人的嘴，親像跛腳的腳空空甩。
26:8 將榮光互愚戇的人，親像用一布袋仔寶石囥佇石堆的內面。
26:9 箴言佇戇人的嘴，親像茦鑿入醉漢的手。
26:10 倩戇人，抑是倩過路人來做工的，親像射箭的射出箭傷著眾人。
26:11 戇人閣再佇伊的戇，親像狗倒轉食伊所吐的。
26:12 你有看見家己掠做智識的人無？戇人比伊猶卡有通向望。
26:13 貧憚的人講：佇路裡有猛的獅，佇街路裡有勇的獅。
26:14 門佇門臼轉，貧憚的人佇眠床裡也是按呢。
26:15 貧憚的人伸手佇盤裡，提倒轉到嘴也嫌著磨。
26:16 貧憚的人看家己有智慧贏過七個應答的人。
26:17 過路人去插無干涉伊的相爭，是親像人著狗的耳。
26:18 人欺騙伊的厝邊，來講：我豈呣是滾笑嗎？是親像癲狂的人火把，以及利箭及人的家私。
26:19 （見箴26：18）。
26:20 火欠柴就會熄；無人學話，相爭就息去。
26:21 愛相爭的人會激動相爭，親像添炭佇的炭，添柴佇火裡。
26:22 學話的人的言語，親像好食的物，深入人的腹內。
26:23 嘴親熱，心奸惡，親像磁器安銀的渣滓。
26:24 怨恨人的，講舖排話，總是心內囥詭詐；
26:25 伊講好聽的話，你呣通信伊，因為伊的心內有七項的可惡。
26:26 伊雖然用詭詐遮掩家己的怨恨，伊的歹欲露現佇會眾的面前。
26:27 掘陷坑的人，家己欲跋佇彼內面；翱石頭的人，石頭欲倒轉來翱著伊。
26:28 白賊的舌怨恨伊所壓傷的人；諂媚的嘴會敗壞人。