19:1 喪鄉來行正直的，贏過講乖謬閣愚戇的。
19:2 心無知識是呣好；腳緊走的，免得犯罪。
19:3 人因為愚戇來敗壞伊的路；伊的心就棄嫌上帝。
19:4 好額就加添多多朋友；喪鄉就朋友及伊離別。
19:5 濫糝干證的人，免得受刑罰；講白賊，會逃脫刑罰。
19:6 大量的人，多多人對伊求恩；送物的，人人做伊的朋友。
19:7 喪鄉人，伊的兄弟攏怨恨伊，何況伊的朋友，閣卡離開伊！欲及講話，已經無佇。
19:8 得著智慧的，疼惜伊的靈魂；保守明理的，欲得著福氣。
19:9 濫糝干證的，免得受刑罰；講白賊的，欲抵著滅無。
19:10 戇人享受宴樂是無合宜；何況奴僕管轄貴族啊？
19:11 人有見識就無快快受氣；赦免人的過失就是伊的榮光。
19:12 王的大受氣親像獅噤噤哮；伊的恩典親像草頂的露水。
19:13 戇的子是老父的災禍；某的吵鬧親像雨水嘈嘈滴。
19:14 厝宅財產是祖公所留的；獨獨的某是耶和華所賜的。
19:15 懶惰互人睏重眠；貧憚的人欲抵著枵餓。
19:16 守誡命的，是守靈魂；無細膩伊的所行的，欲致到死無。
19:17 憐憫喪鄉人的，就是借互耶和華；伊欲照伊所行的好事來還伊。
19:18 趁猶有向望，著教督你的子；你呣通有意思欲互伊死。
19:19 大受氣的人的確著受刑罰；你若救伊，著閣加一擺。
19:20 你著聽苦勸，受教示，互你到尾有智慧。
19:21 人心內有多多計謀；獨獨耶和華的旨意才會穩當。
19:22 人所意愛，是伊仁慈的量；喪鄉人比講白賊卡好。
19:23 敬畏耶和華，就會得著活命；伊欲安居飽足，無抵著災禍。
19:24 貧憚的人伸手佇盤裡，也呣肯提到嘴。
19:25 拍侮慢的人，戇直的欲醒悟；責備明理的人，伊就卡知識。
19:26 歹款待老父、革逐老母的，是卸敗致到凌辱的子。
19:27 我的子啊，人若教示你棄拺智識的話，你決斷呣通聽。
19:28 做無影跡的干證戲弄公平；歹人吞落罪惡。
19:29 刑罰是為著侮慢的人設；鞭拍也是為著戇人的尻脊。