17:1 筵席滿厝，也有相爭，呣值著一塊仔餅干，閣有安靜。
17:2 奴僕辦代誌，欲管轄卸敗的子，閣佇兄弟的中間相及分家伙。
17:3 篋仔是欲鍛煉銀，爐是欲鍛煉金；獨獨耶和華鍛煉人的心。
17:4 行歹的，留心聽奸詐的話；講白賊的，注意聽邪惡的言語。
17:5 恥笑喪鄉人的，是凌辱創造伊的主；歡喜人抵著災禍的，免得受刑罰。
17:6 子孫是老人的冕旒；老父是子兒的榮光。
17:7 戇人講大話是無合，何況有道德的人講白賊啊？
17:8 賄賂的物佇受著的人看做寶石，無論向叨落一方面攏亨通。
17:9 遮掩人的過失的，是憶著仁愛；代誌沓沓唸的，互親密的朋友冷淡。
17:10 明理的人一下受責備就入伊的心，贏過拍戇人一百下。
17:11 歹人專務反叛，所以欲差殘忍的使者去攻擊伊。
17:12 寧可抵著失落子的熊母，呣通抵著戇人的愚躇惡。
17:13 用歹報好的，災禍無離開伊的家。
17:14 相爭的起頭親像水破隙，所以，佇到鬧的代先著互冤家息。
17:15 擬定歹人做義，定義人做有罪的，此二項攏是耶和華所厭惡。
17:16 戇人既然無明理，啥事有錢提佇手裡買智慧？
17:17 朋友時常相親愛，兄弟的出世為著救患難。
17:18 佇厝邊的面前答應做保認，彼號人就是戇人。
17:19 愛相爭的人，是愛犯罪；門戶創高的人，是家己取敗壞。
17:20 心乖僻的，無通尋著福氣；舌反來反去的，陷落佇患難。
17:21 生戇子，是家己的憂悶；戇人的父攏無通歡喜。
17:22 歡喜的心是好藥；憂傷的心神互骨枯焦。
17:23 歹人暗靜受賄賂，欲互案件反輪轉。
17:24 智慧是佇明理的人的面前；戇人的目睭看佇地的極頭。
17:25 愚戇的子互老父煩惱，互老母憂苦。
17:26 刑罰義的人是呣好；拍秉公的官府也是按呢。
17:27 言語少的，有智識；性情獬在的，有聰明。
17:28 戇的人若靜靜也算做智慧；嘴密的也算做聰明。