15:1 溫和的應答，會互受氣息；講話躁暴，會激起受氣。
15:2 智慧的人的舌講知識；戇人的嘴吐出愚戇。
15:3 耶和華的目睭逐所在佇；好歹攏鑑察。
15:4 純良的舌是活命的樹；若有乖謬者就會損傷心神。
15:5 戇人看輕老父的教督；願受責備的，得著見識。
15:6 義人的厝內有多多財寶；歹人所趁的是做伊的陷害。
15:7 智慧的人的嘴唇報揚知識；戇人的心攏無按呢。
15:8 歹人獻祭，是耶和華所厭惡；正直的人祈禱，是伊所歡喜。
15:9 歹人的路，是耶和華所厭惡；獨獨追公義的，就得伊疼。
15:10 放拺正路的，欲受重重的責罰；怨恨責備的，欲致到死無。
15:11 陰府及滅無攏佇耶和華的目睭前，何況世間人的心啊？
15:12 侮慢的人呣愛受責備；也無欲就近智慧的人。
15:13 快樂的心，會互面笑笑；心若憂悶，會損傷心神。
15:14 聰明的人的心尋知識；戇人的嘴一味好愚戇。
15:15 困苦的人的日子攏有災禍；心快樂的人，筵席無斷。
15:16 好額也有掛慮，呣值著喪鄉來敬畏耶和華。
15:17 食菜蔬，大家相疼，贏過食肥的牛仔，大家相怨恨。
15:18 歹性地的人惹起冤家；無快快受氣的人會互相爭息。
15:19 貧憚的人的路是親像莿帕的籬笆；正直的人的路成做大路。
15:20 智慧的子互老父歡喜；戇人看輕伊的老母。
15:21 無知的人掠愚戇做歡喜；明理的人照正直來行。
15:22 無相及參詳，所計謀會失敗；謀士多多，所計謀會成。
15:23 人的嘴應答合宜，就會歡喜；合時的話好到怎樣！
15:24 智慧的人有活命的路來上去，得著離開佇下底的陰府。
15:25 耶和華欲拆毀驕傲的人的厝，欲安定寡婦的地界。
15:26 歹的計謀是耶和華所厭惡；若是好的話是清潔。
15:27 貪財的，陷害家己的家；怨恨賄賂的，得著活。
15:28 義人的心，想了才應；歹人的嘴吐出歹代。
15:29 耶和華離開歹人遠遠，總是伊聽義人的祈禱。
15:30 目睭的光明，互心歡喜；好消息，會潤澤骨。
15:31 聽趁活命的責備的，欲徛起佇智慧的人的中間。
15:32 呣聽警戒的，是看輕家己；總是聽趁責備的，就得著見識。
15:33 敬畏耶和華是智慧的教示；謙卑就是榮光的代先。