24:1 巴蘭看見耶和華歡喜賜福互以色列，就無親像往擺去尋法術，是面向曠野。
24:2 巴蘭抬目，看見以色列人照支派徛起。上帝的神就臨到伊，
24:3 伊就提起伊的歌講：比珥的子巴蘭講，目睭合的人講，
24:4 聽見上帝的話，看見全能者的異象，目睭展開倒的人講：
24:5 雅各啊，你的布棚怎樣許娞？以色列啊，你的帳房怎樣許好看！
24:6 親像相連續的山谷，親像河邊的園，親像耶和華所栽的沈香樹，親像水邊的柏香樹。
24:7 水欲對伊的桶流出；種子欲撒佇多多水的所在。伊的王欲過亞甲；伊的國欲興起。
24:8 上帝導伊出埃及；伊親像有野牛的力。伊欲吞食對敵的國，遏折的骨頭，用箭射到過。
24:9 伊撐腳閣倒親像公的獅，也親像母的獅，是誰敢惹著伊？見若祝福你的，願伊受祝福；見若咒詛你的，願伊受咒詛。
24:10 巴勒大受氣巴蘭，就搭手，巴勒閣給巴蘭講：「我叫你來咒詛我的對敵，你竟然專專祝福到此三擺。
24:11 今你走去本所在！我本想欲互你得著大尊貴，若是耶和華阻擋互你無得著尊貴。」
24:12 巴蘭對巴勒講：「我豈無對你所差到我遐的使者講：
24:13 『巴勒就若將伊滿厝的金銀互我，我也得過耶和華的命令，憑家己的心來做好做歹。耶和華所講的，我就講伊。』」
24:14 「看啊，今我欲倒去本族。你來，我給你講諸個百姓日後欲怎樣款待你的百姓。」
24:15 伊就提起伊的歌講：比珥的子巴蘭講：目睭合的人講，
24:16 聽見上帝的話，得著知至高者的知識，看見全能者的異象，目睭展開倒的人講：
24:17 我看伊總是無佇現時；我觀看伊總是呣是近近。有一粒星欲對雅各出，有一個權柄欲對以色列興起，欲拍破摩押的邊角，毀壞擾亂的人。
24:18 以東欲做業，西珥也欲做業互伊的對敵；以色列欲行代誌勇敢。
24:19 有一位掌權的，欲對雅各出；伊欲剿滅城中所留的。
24:20 伊閣看見亞瑪力，就提起伊的歌講：亞瑪力本做諸個國的頭，總是伊的結局欲永永滅無。
24:21 伊閣看基尼人，就提起伊的歌講：你徛起的所在是堅固；你做巢佇山巖。
24:22 總是基尼欲致到衰微，直到互亞述掠你去。
24:23 伊閣提起歌講：哀啊！上帝行此個事的時，是誰會得著活？
24:24 欲有船對基提遐來，苦楚亞述，苦楚希伯；伊也欲永永滅無。
24:25 巴蘭就起來，倒去伊本所在，巴勒也行伊的路。
