22:1 以色列人起身，紮營佇摩押的平洋、佇約但河外，耶利哥的對面。
22:2 西撥的子巴勒，看見以色列人對亞摩利人所行一切的事。
22:3 摩押真驚彼個百姓，因為真多，摩押因為以色列百姓，心就著急，
22:4 摩押給米甸的長老講：「今此群的人欲一盡食咱四圍所有的，親像牛食田裡的草一般。」彼時西撥的子巴勒做摩押王。
22:5 伊差使者去大河邊的毗奪，到比珥的子巴蘭的本所在，叫伊來，講：「看啊，有一個百姓對埃及出來，看啊，遮滿地面，也徛起佇我的對面。
22:6 今請你來，給我咒詛此個百姓，因為比我卡強，豈採我會拍來卡贏，趕出此個所在。因為我知，你所祝福的，就得著福氣；你所咒詛的，就受咒詛。」
22:7 摩押長老及米甸的長老就起身手帶卜卦的禮，去到巴蘭遐，將巴勒的話給伊講。
22:8 伊對講：「今暝恁歇遮，照耶和華所吩咐我的我欲回覆恁。」摩押的首領就歇佇巴蘭遐。
22:9 上帝臨到巴蘭，問伊講：「及你住許個人是是誰？」
22:10 巴蘭應上帝講：「是摩押王西撥的子差人到我遮，講：
22:11 『看啊，有百姓對埃及來，遮滿地面，請你來給我咒詛，豈採我會贏，趕出去。』」
22:12 上帝對巴蘭講：「你呣通及去，也呣通咒詛此個百姓，因為是得著福氣的。」
22:13 巴蘭清早起來，對巴勒的首領講：「恁倒去恁的所在，因為耶和華呣准我及恁去。」
22:14 摩押的首領就起來，倒去巴勒遐，講：「巴蘭呣肯及阮來。」
22:15 巴勒閣差首領，比前卡多卡尊貴的。
22:16 到巴蘭遐，對伊講：「西撥的子巴勒按呢講：『求你呣通互甚麼代誌阻擋你無來我遮，
22:17 因為我欲互你得著極大的尊貴。見若你對我講甚麼，我欲照按呢行；所以請你來，給我咒詛此個百姓。』」
22:18 巴蘭對巴勒諸個人臣講：「巴勒就若用滿厝的金銀互我，我也呣敢過我的上帝的命令來加減行。
22:19 請恁今暝閣歇遮，聽候我知耶和華閣給我講甚麼。」
22:20 彼暝，上帝臨到巴蘭遐，講：「諸個人若來叫你，你就起來及伊去，總是我所欲給你講的，你著遵趁。」
22:21 巴蘭早起起來，備辦驢，及摩押的首領相及去。
22:22 上帝因為伊去就受氣；耶和華的使者徛佇路裡來抵敵伊。伊騎驢，二個奴僕跟隨伊。
22:23 驢看見耶和華的使者徛佇路裡，手裡拔刀，驢就對路裡閃入園，巴蘭就拍驢，欲互伊歸原路。
22:24 耶和華的使者就徛佇葡萄園的狹路；此旁有牆，彼旁也有牆。
22:25 驢看見耶和華的使者，就閃倚彼個牆，夾巴蘭的腳佇牆裡；巴蘭就閣拍伊。
22:26 耶和華的使者閣進前去，徛佇狹狹的所在，雙旁無路通越。
22:27 驢看見耶和華的使者，就仆佇巴蘭的下底，巴蘭發受氣，用枴仔拍驢。
22:28 耶和華開驢的嘴，驢對巴蘭講：「我對你做甚麼，你竟然拍我此三擺啊？」
22:29 巴蘭對驢講：「因為你戲弄我，我恨手裡無刀，有，就給你死。」
22:30 驢對巴蘭講：「我豈呣是你的驢你一生所騎的嗎？我平素曾對你按呢行嗎？」巴蘭講：「無。」
22:31 彼時，耶和華開巴蘭的目睭，伊就看見耶和華的使者徛佇路裡，手拔刀，巴蘭就俯頭仆佇地裡。
22:32 耶和華的使者對伊講：「你啥事此三擺拍你的驢啊？看啊，我出來抵敵你，因為你佇我的面前所行的，是悖逆。
22:33 驢看見我，就閃避我此三擺；設使驢無閃避我，我已經死你，互驢活。」
22:34 巴蘭對耶和華的使者講：「我有犯罪啦。我呣知你徛佇路裡阻擋我；你若無歡喜我去，我就倒轉去。」
22:35 耶和華的使者對巴蘭講：「你及諸個人去！總是你只有通講我所欲對你講的。」巴蘭就及巴勒的首領相及去。
22:36 巴勒聽見巴蘭來，就去摩押城迎接伊；此個城是佇邊界的極頭，佇亞嫩的邊頭。
22:37 巴勒對巴蘭講：「我豈呣是切切差人到你遐去叫你嗎？你啥事無來我遮啊？我豈無真正會互你尊貴嗎？」
22:38 巴蘭應巴勒講：「我今來到你遮！我豈有權會講甚麼啊？上帝用甚麼話交代我，我就講伊。」
22:39 巴蘭及巴勒相及行，來到基列胡瑣。
22:40 巴勒牛羊獻祭，就送互巴蘭以及及伊佇的首領。
22:41 到隔早起，巴勒導巴蘭到巴勒的高位；巴蘭對遐看以色列百姓極頭的所在。