5:1 錫安成隊的百姓啊，今你聚集做軍隊；伊圍圍攻擊咱，用枴仔拍以色列審判司的嘴。
5:2 伯利恆以法他啊，你佇猶大諸個鄉社中做微細者，欲有一個對你遐出來，佇以色列中間給我做掌權者；伊的根源對古早，對第一起頭就有。
5:3 所以伊欲將交互對敵，到生產的婦仁人生子。彼時伊所剩的兄弟欲倒來歸以色列。
5:4 伊欲徛，倚靠耶和華的權能，及伊的上帝──耶和華威嚴的名，來飼伊的羊群。欲安然徛起；伊欲做大，到地的極頭。
5:5 此個人欲做咱的平安。亞述入咱的地界，睭踏咱的宮殿的時，咱欲興起七個牧者，八個首領攻擊伊。
5:6 欲用刀劍毀壞亞述地及寧錄的地，佇伊出入的所在。亞述入咱的地，睭踏咱的地界的時，伊欲救咱脫離。
5:7 雅各剩的人欲佇多多國的百姓中，親像對耶和華降落的露水，閣親像潤澤草的雨；呣免倚靠人，也無聽候世間人。
5:8 雅各所剩的人欲佇多多國的百姓中，親像樹林內百獸中的獅，也親像細隻勇的獅佇羊群中。伊若經過就欲睭踏拆裂，無人會救伊。
5:9 願你的手抬起，佇你的對敵的頂面！願你的對敵攏受剪除！
5:10 耶和華講：到彼日，我欲對你中間除去你的馬，毀壞你的車，
5:11 我欲毀滅你的地方諸個城，捙倒你一切的衛所，
5:12 我也欲除去你手中的邪術；佇你遐無閣有占卜者。
5:13 我欲對你中間除滅雕刻的偶像及柱像，你就無閣跪拜家己的手所造的。
5:14 我欲對你中間拔出你諸個柴柱，閣毀滅你諸個城。
5:15 我欲發出大受氣來報應許個無順趁的國。