26:1 耶穌講諸個話息，就給伊的學生講：
26:2 「恁知，過二日過節就到，人子抵著解送，去釘十字架。」
26:3 彼時許個祭司頭及百姓的長老聚集佇祭司頭名該亞法的院。
26:4 相及參詳用詭譎的計掠耶穌，來伊。
26:5 總是講：「當節期呣通，驚了百姓的中間有擾亂。」
26:6 耶穌佇伯大尼癩西門的厝，
26:7 有婦仁人帶玉瓶，內面貯極貴氣的香油就近伊，當伊坐桌的時，傾佇伊頭殼頂。
26:8 學生看見就受氣，講：「按呢破費有啥路用！
26:9 因為此個油會賣得多多銀，來互喪鄉人。」
26:10 耶穌知，就給講：「恁啥事刁難此個婦仁人啊？因為伊所行來款待我的是好事。
26:11 因為常常有喪鄉人及恁佇；若是我無常常及恁佇。
26:12 因為伊倒此個油佇我身軀，就是備辦我埋葬來行的。
26:13 我實在給恁講，普天下，無論甚麼所在傳此個福音，也欲講起此個婦仁人所行，來紀念伊。」
26:14 彼時，十二個學生一個名做加略人猶大，去見許個祭司頭，講：
26:15 「恁欲互我偌多？我欲將伊交互恁。」就及伊約互伊銀三十。
26:16 對彼時，伊尋機會將耶穌交互。
26:17 除酵節的頭一日，學生就近耶穌講：「愛阮佇甚麼所在給你備辦食過節？」
26:18 伊講：「恁入城，尋某人，給伊講：『先生講：我的時近啦，我及我的學生守過節佇你兜。』」
26:19 學生照耶穌所吩咐的去行，就備辦過節。
26:20 到日暗，耶穌及十二個學生坐桌。
26:21 食的時，耶穌講：「我實在給恁講，恁中間一人欲賣我。」
26:22 眾人真憂悶，一個一個給伊講：「主啊，總無是我哦？」
26:23 伊應講：「及我伸手佇盤裡者，彼個欲賣我。
26:24 人子倒去，照所記載指伊的話；若是賣人子的有災禍啊！彼人無出世卡好。」
26:25 賣伊的猶大講：「拉比，總無是我哦？」給伊講：「你已經講啦。」
26:26 食的時，耶穌提餅，祝謝，擘破，分互學生，講：「提去食，此個是我的身軀」；
26:27 閣捧杯，祝謝，互，講：「恁攏著飲伊；
26:28 此個是我的血就是盟約的血，為著多多人來流出的，致到罪得著赦免。
26:29 若是我給恁講，今了後，我無飲此個葡萄的汁。聽候彼日我及恁飲彼個新的佇我的父的國。」
26:30 已經吟詩，就出來去橄欖山。
26:31 彼時，耶穌給講：「今暝，恁攏欲為著我來受塞礙。因為有記載講：我欲拍牧者，就羊群四散。
26:32 若是我復活了後，欲代先恁去加利利。」
26:33 彼得應伊講：「眾人雖然為著你來受塞礙，也我永永無受塞礙。」
26:34 耶穌給伊講：「我實在給你講，今暝雞猶未啼，你欲三擺呣認我。」
26:35 彼得給伊講：「我就若著及你死，也決斷無呣認你。」眾學生也攏是按呢講。
26:36 耶穌及到一所在，名客西馬尼，給伊的學生講：「恁諸個坐遮，聽候我去遐祈禱。」
26:37 才導彼得及西庇太二個子相及去，就憂悶，慘慼，
26:38 給講：「我的心真憂悶，到欲死；恁住遮及我警醒。」
26:39 略略仔進前，面仆佇地裡，祈禱講：「我的父啊，若會做得，著互此個杯離開我。總是，呣是照我所愛，是照你所愛。」
26:40 就來學生遐，看見睏，給彼得講：「按怎樣？恁會及我警醒半時久啊？
26:41 著警醒著祈禱，免得入佇迷惑。心神甘願，若是肉體軟茈。」
26:42 第二擺閣去祈禱講：「我的父啊，此個杯若得離開我，的確著我飲伊，就願你的旨意得成。」
26:43 閣再來，看見又睏，因為的目睭澀。
26:44 離開閣去。第三擺祈禱，也是講許個話。
26:45 彼霎閣就近學生，給講：「今通睏來安息啦！時近啦，人子受賣佇罪人的手。
26:46 起來！相及行。賣我的人近啦！」
26:47 猶講的時，忽然十二個學生的一個猶大來，也有歸陣人抬刀及槌仔，對諸個祭司頭及百姓的長老遐相及來。
26:48 賣伊的曾及套暗號，講：「我給伊唚的彼人就是。恁通掠伊。」
26:49 即時就近耶穌，講：「拉比，平安」，就直直給伊唚。
26:50 耶穌給伊講：「朋友啊，你欲來做的，就做。」許個人就進前，起手掠耶穌。
26:51 忽然有及耶穌佇的一人伸手拔刀，祭司頭的奴僕，削去伊一個耳仔。
26:52 耶穌就給伊講：「收你的刀入原位！因為凡若抬刀的，欲對刀死。
26:53 抑是你拍算我會求我的父就伊佇此霎欲給我差十二營卡加的天使嗎？
26:54 若按呢，就聖經所講，此個代誌的確有的怎樣會應驗啊？」
26:55 彼時耶穌給許個人講：「恁抬刀及槌仔出來掠我，親像欲掠賊嗎？我日日坐佇殿內教示人，也恁無掠我。
26:56 總是此個事攏成，是欲應驗先知所記載的。」彼時學生攏離開伊走。
26:57 掠耶穌的帶伊到祭司頭該亞法的所在；佇遐許個經學士及長老已經聚集。
26:58 彼得遠遠隨伊到祭司頭的院，入內面及許個差役相及坐，欲看彼個結局。
26:59 諸個祭司頭及全公會尋濫糝的干證攻擊耶穌，愛互伊死。
26:60 雖然多多濫糝干證的來，也無得著。後來有二個到，
26:61 講：「此人曾講：『我會毀壞上帝的殿，三日就起伊。』」
26:62 祭司頭起來，給伊講：「你攏無應嗎？諸個人所干證你的是甚麼？」
26:63 若是耶穌靜靜，祭司頭給伊講：「當此個真活上帝，我命令你咒誓來給阮講，你果然是上帝的子基督抑呣是？」
26:64 耶穌給伊講：「你已經講啦。若是我給恁講，對此霎了後恁欲看見人子坐佇有權能者的大旁，坐天的雲來。」
26:65 對按呢祭司頭拆裂家己的衫，講：「伊講出僭權褻瀆的話，咱猶久欠甚麼干證啊？今恁已經聽見，伊的僭權褻瀆啦。
26:66 恁拍算怎樣？」應講：「伊該死。」
26:67 就呸涎佇伊的面，用拳頭拇掙伊，也有的用手搧伊，講：
26:68 「基督啊，你是先知，著給阮講拍你的是是誰？」
26:69 彼得坐佇外院，有一個女婢近倚伊，講：「你也曾及加利利人耶穌做陣。」
26:70 彼得當眾人的面前呣認，講：「我呣知你講甚麼！」
26:71 出去，到院門，閣一個女婢看見伊，給佇遐的人講：「此個也曾及拿撒勒人耶穌做陣。」
26:72 彼得閣呣認，續咒誓講：「我呣識彼個人。」
26:73 有許久，邊仔徛的人近倚，給彼得講：「你實在也是的黨，因為對你的腔口露出。」
26:74 伊才咒罵，閣咒誓，講：「我呣識彼個人。」雞就啼。
26:75 彼得就記得耶穌的話講：「雞猶未啼，你欲三擺呣認我。」就出去外面大啼哭。