14:1 當彼時，分封的人君希律聽見耶穌的名聲，
14:2 就給伊的差用講：「此個就是行洗禮的約翰，伊是對死人中復活，所以有諸個權能對伊顯出。」
14:3 因為前希律為著伊的兄弟腓力的某希羅底的緣故，有掠約翰縛伊，關落監。
14:4 因為約翰曾給伊講：「你接納此個婦仁人是不法。」
14:5 希律愛伊，獨獨驚百姓，因為掠約翰做先知。
14:6 抵著希律做生日，希羅底的查某子跳舞佇中間，來互希律歡喜。
14:7 對按呢咒誓，允欲照伊所愛求的攏互伊。
14:8 伊互老母使唆，就講：「將行洗禮約翰的頭殼貯佇盤裡，就遮互我。」
14:9 王真憂悶，總是為著所咒的誓，閣有同桌的人佇，就命令互伊；
14:10 差人去監裡約翰。
14:11 將伊的頭殼貯佇盤裡，來互查某囝仔；伊就捧去互伊的老母。
14:12 伊的學生來，收伊的身屍去埋葬，就去給耶穌講。
14:13 耶穌聽見，就上船對遐退去曠野，家己住。眾人聽見，就對諸個城步行隨伊。
14:14 伊出去，看見歸大陣的人，就憐憫，醫好中間有病的。
14:15 日晚晡，學生就近伊，講：「遮是曠野，閣時已經過，著互眾人四散，通去鄉社買食。」
14:16 耶穌給講：「呣免去，恁互食！」
14:17 給伊講：「阮佇遮只有五個餅，二尾魚。」
14:18 伊講：「提來互我。」
14:19 就吩咐眾人坐佇草埔，就提彼五個餅，二尾魚，向天來祝謝，擘餅互學生，學生互眾人。
14:20 攏食到飽，拾所剩的屑仔，滿十二筐。
14:21 食的人，婦仁人囝仔以外，約略五千。
14:22 伊隨時迫學生上船，代先過去彼旁，聽候伊四散眾人。
14:23 四散眾人了後，就家己上山祈禱。已經暗，只有伊家己佇遐。
14:24 彼時船佇海中，互湧搖泏，因為是對頭風。
14:25 暝時四更，耶穌對海面行，就近。
14:26 學生看見伊行佇海面，就生驚，講：「是怪物！」因為驚，就喉叫。
14:27 耶穌連鞭及講話，講：「安恁的心，是我，呣免驚！」
14:28 彼得應伊講：「主啊！果然是你，就命令我行水面就近你。」
14:29 伊講：「來。」彼得就對船裡落去，行水面，欲就近耶穌；
14:30 總是看見風，就驚，欲沈落去，就喉叫講：「主啊，救我！」
14:31 耶穌隨時伸手牽伊，講：「小信的人，啥事僥疑？」
14:32 上船，風就定。
14:33 船裡的人拜伊，講：「你真正是上帝的子。」
14:34 已經過去，就到革尼撒勒地。
14:35 彼位的人識伊，差人去四方，導一切有病的來就近伊，
14:36 求伊若使互摸伊的衫仔裾的鬚；見若摸的人齊全好。