16:1 安息日已經過身，抹大拉的馬利亞及雅各的老母馬利亞及撒羅米，有買香料欲來抹耶穌。
16:2 七日頭一日真早，日抵仔出，到墓，
16:3 相及講：「是誰仔欲替咱翱彼塊石離開墓門啊？」
16:4 抬目就看見，彼塊石已經翱開，因為是真大塊。
16:5 入墓，看見一個少年人坐佇正旁，穿白衫，就卬愕。
16:6 少年人給講：「呣免卬愕！恁是尋釘十字架的拿撒勒人耶穌，伊已經復活，無佇遮。你看，伊埋葬的所在。
16:7 今著去給伊的學生及彼得講：『伊代先恁去加利利。恁佇遐欲看見伊，照伊所給恁講的。』」
16:8 諸個婦仁人出去，離開墓就走，因為愕愕惙卬愕，也無給人講甚麼，因為真驚。
16:9 七日的頭日清早，耶穌已經復活，代先出現佇抹大拉的馬利亞（就是耶穌前曾對伊趕出七個鬼的）。
16:10 平時及耶穌同佇的人；彼時憂悶啼哭，馬利亞去給講。
16:11 聽見伊活，閣互馬利亞看見，竟然呣信。
16:12 以後，中間二人去山場。行的時，耶穌出現互看見，伊的容貌及平常無同。
16:13 去給其餘的講；總是許個人也呣信。
16:14 後來，十一個學生坐食的時，耶穌出現互看見，責備的呣信及硬心，因為有人看見伊已經復活，也呣信許個人的話。
16:15 耶穌閣給講：「恁去普天下，傳福音互萬百姓。
16:16 信來受洗禮的，欲得著救；呣信的，欲受定罪。
16:17 信的人欲有諸個神蹟隨，就是託仗我的名趕鬼；講新的腔口；
16:18 掠蛇；抑是飲著甚麼毒也攏無傷害；閣用手按破病的人，就好。」
16:19 主耶穌及講息，就得著接納上天，坐佇上帝的大旁。