Bible Search| Advanced Search | Passage Lookup | Read the Bible

Bible Book - INDEX

TAIWAN 台語漢字羅馬本

[1][2][3][4][5][6][7][8][9][10][11][12][13][14][15][16][17][18][19][20][21][22][23][24]

Luke
Chapter 3

3:1 提庇留該撒坐位的十五年,本丟彼拉多做猶太的總督,希律做加利利分封的人君,伊的兄弟腓力做以土利亞及特拉可尼地方分封的人君,呂撒聶做亞比利尼分封的人君,

3:2 亞那及該亞法做祭司頭的時,撒迦利亞的子約翰佇曠野裡,上帝的話到佇伊。

3:3 伊就到約但河的四方,傳反悔的洗禮,互人得著赦罪。

3:4 親像先知以賽亞冊裡所記的話,講:有叫佇曠野的,伊的聲講:備辦主的路,修直伊的小路!

3:5 諸個山谷攏欲填淀;諸個大小的山頭攏欲互伊低!彎曲的欲互伊直;嵁硈的欲互伊平!

3:6 凡有肉體的欲看見上帝的拯救!

3:7 多多人出來欲受約翰的洗禮,伊就對講:「毒蛇的類啊!是誰仔指示恁閃避將來的受氣啊?

3:8 所以恁著結彼號合佇反悔的果子。莫得家己拍算:『有亞伯拉罕做阮的父。』因為我給恁講,上帝會對諸個石頭,出子孫互亞伯拉罕。

3:9 今斧頭已經下佇樹頭,見若樹無結好果子的就剉伊,落火。」

3:10 眾人問伊講:「按呢,阮著怎樣做?」

3:11 伊應講:「有二領衫的,著分互無的;有物通食的,也著按呢。」

3:12 抽餉的也來欲受洗禮,對伊講:「先生啊,阮著怎樣做?」

3:13 伊對講:「定著的餉以外,莫得加提。」

3:14 兵丁也問伊講:「也阮著怎樣做?」伊對講:「莫得勒索人,莫得彎人,著掠恁所得著的糧做夠額。」

3:15 百姓向望的時,眾人心內議論約翰豈採是基督。

3:16 約翰應眾人講:「我用水給恁行洗禮,獨獨有一個比我卡有權能的欲來,就若解伊的鞋帶我也堪得。伊欲用聖神及火給恁洗。

3:17 伊的手提簸箕,欲將伊彼場一盡簸,收麥入伊的倉,若是麥香就用熄的火燒伊。」

3:18 約翰另外用多多項項苦勸,來傳福音互百姓。

3:19 獨獨分封的人君希律,因為伊的兄弟的某希羅底的緣故,閣因為所行攏總的歹代,互約翰責備;

3:20 今閣加一項,就是將約翰關佇監裡。

3:21 眾百姓已經受洗禮,耶穌也已經受洗禮。祈禱的時,天開,

3:22 聖神降臨佇伊的頂面,形狀親像鴿仔;閣對天有聲,講:「你是我疼的子,我歡喜你。」

3:23 耶穌出頭的時,約略三十歲。伊照人看,是約瑟的子;約瑟是希里的子;

3:24 希里是瑪塔的子;瑪塔是利未的子;利未是麥基的子;麥基是雅拿的子;

3:25 雅拿是約瑟的子;約瑟是瑪他提亞的子;瑪他提亞是亞摩斯的子;亞摩斯是拿鴻的子;拿鴻是以斯利的子;以斯利是拿該的子;

3:26 拿該是瑪押的子;瑪押是瑪他提亞的子;瑪他提亞是西美的子;西美是約瑟的子;約瑟是猶大的子;

3:27 猶大是約亞拿的子;約亞拿是利撒的子;利撒是所羅巴伯的子;所羅巴伯是撒拉鐵的子;撒拉鐵是尼利的子;尼利是麥基的子;

3:28 麥基是亞底的子;亞底是哥桑的子;哥桑是以摩童的子;以摩童是珥的子;珥是約細的子;

3:29 約細是以利謝的子;以利謝是約令的子;約令是瑪塔的子;瑪塔是利未的子;

3:30 利未是西緬的子;西緬是猶大的子;猶大是約瑟的子;約瑟是約南的子;約南是以利亞金的子;

3:31 以利亞金是米利亞的子;米利亞是買南的子;買南是瑪達他的子;瑪達他是拿單的子;拿單是大衛的子;

3:32 大衛是耶西的子;耶西是俄伯的子;俄伯是波斯的子;波斯是撒門的子;

3:33 撒門是拿順的子;拿順是亞米拿達的子;亞米拿達是亞蘭的子;亞蘭是希斯崙的子;希斯崙是法勒斯的子;法勒斯是猶大的子;

3:34 猶大是雅各的子;雅各是以撒的子;以撒是亞伯拉罕的子;亞伯拉罕是他拉的子;他拉是拿福的子;

3:35 拿福是西鹿的子;西鹿是拉吳的子;拉吳是法勒的子;法勒是希伯的子;希伯是沙拉的子;

3:36 沙拉是該南的子;該南是亞法撒的子;亞法撒是閃的子;閃是挪亞的子;挪亞是拉麥的子;

3:37 拉麥是瑪土撒拉的子;瑪土撒拉是以諾的子;以諾是雅列的子;雅列是瑪勒列的子;瑪勒列是該南的子;該南是以挪士的子;

3:38 以挪士是設的子;設是亞當的子;亞當是上帝的子。