10:1 諸個代誌了後，主閣設立七十人，一對一對差做頭去伊所欲到逐個城，逐個所在，
10:2 對講：「通收成的是多，做工的是少。所以，恁著求園主迫工去給伊收成。
10:3 恁去啊！我差恁，親像羊仔入豺狼的中間。
10:4 莫得帶錢袋，莫得褡褳，莫得鞋；路裡莫得給人請安。
10:5 無論入甚麼厝，著代先講：『願此家平安。』
10:6 設使有合宜得著平安的人佇遐，就恁的平安會到佇伊；若無，就倒歸佇恁。
10:7 著佇彼家，飲食所供給的，因為做工人堪得得著伊的工錢；莫得對此家徙去彼家。
10:8 無論入甚麼城，人若接納恁，著食所排佇恁面前的。
10:9 城內有病的著醫好，續給講：『上帝國近恁啦。』
10:10 若是無論入甚麼城，人呣接納恁，就著出去的大街路，講：
10:11 『連恁的城的土粉住佇阮的腳的，阮也對恁拭去。總是恁著知上帝的國近啦。』
10:12 我給恁講，佇彼日，所多瑪比彼個城猶卡快擔當！」
10:13 「哥拉汛啊，你有災禍！伯賽大啊，你有災禍！因為佇恁中間所行諸個權能若有行佇推羅及西頓，就早早穿麻衫摻火灰，坐來反悔。
10:14 若是當審判的時，推羅及西頓比恁猶卡快擔當！
10:15 迦百農啊，你豈會得著舉起到天嗎？你欲捙落陰府。
10:16 聽恁的就是聽我；棄拺恁的就是棄拺我；棄拺我的就是棄拺差我的。」
10:17 許個七十人倒轉來歡喜，講：「主啊！用你的名，鬼也降服阮。」
10:18 耶穌給講：「我有看見撒但，親像閃爁對天跋落來。
10:19 我已經互恁有權通踏蛇及蠍仔蟲，閣贏過對敵攏總的氣力，決斷無一項會害著恁。
10:20 總是，莫得因為諸個神降服恁來歡喜，著因為恁的名記佇天裡來歡喜。」
10:21 當彼時，耶穌佇聖神快樂，講：「父啊，天地的主，我謳咾你！因為你將諸個事對智慧聰明的有隱密伊，對細子有顯明伊。父啊！是啦，因為你看按呢做歡喜。
10:22 萬項有對我的父攏交付我；父以外，無一個識子是是誰；子及子所愛欲指示的以外，也無一個識父是是誰。」
10:23 就越轉身暗靜對學生講：「看見恁所看見的，許個目睭有福氣。
10:24 因為我給恁講，前有多多，先知及君王愛看恁所看見的，也無看見，愛聽恁所聽見的，也無聽見。」
10:25 有一個教律法的先生起來試伊，講：「先生啊！我著怎樣做才會得著永活？」
10:26 耶穌對伊講：「佇律法有記甚麼？你讀了怎樣？」
10:27 伊應講：「你著盡心、盡性、盡力、盡意疼主──你的上帝；也著疼厝邊親像家己。」
10:28 耶穌給伊講：「你所應的是著；行此個，就會活。」
10:29 若是伊愛顯明家己做著，就對耶穌講：「是誰是我的厝邊？」
10:30 耶穌應伊講：「有一人對耶路撒冷落去耶利哥，抵著賊剝伊的衣裳，拍伊到半死，放下做去。
10:31 湊巧有一個祭司對彼條路落去，看見伊，就閃對彼旁過去。
10:32 閣有一個利未人到彼所在，看了，猶原對彼旁過去。
10:33 獨獨有一個撒瑪利亞人行路對遐過，看見就憐憫伊，
10:34 近倚用酒斟佇伊著傷的所在，給伊包，將家己的精牲互伊騎，導伊到客店來照顧伊。
10:35 隔日提銀仔二個，互店主，講：『著照顧此人；所費若卡加，我倒轉來才還你。』
10:36 此三人中你拍算叨落一個做抵著賊彼人的厝邊？」
10:37 伊講：「憐憫伊的就是。」耶穌給伊講：「你去照按呢來行。」
10:38 行的時，耶穌入一個鄉社。有一個婦仁人，名馬大，接納伊佇伊的厝。
10:39 伊有一個姊妹，叫做馬利亞，坐佇主的腳下來聽伊的話。
10:40 馬大因為接待，代誌多，心忙，就近耶穌，講：「主啊，我的姊妹放我家己摸，你無要緊嗎？著教伊來助我。」
10:41 若是主應講：「馬大啊！馬大啊！你為著多多代誌掛慮紛雜，
10:42 若是所欠用的是一項若定；因為馬利亞已經揀著好的份額，就是給伊搶得的。」