5:1 耶和華啊，求你記念阮所抵著的事，看阮所受的凌辱來鑑察伊。
5:2 阮的產業歸佇外邦人；阮的厝宅歸佇別族。
5:3 阮是無老父的孤兒；阮的老母親像寡婦。
5:4 阮著出銀才有水通飲；阮燃柴亦著買。
5:5 追阮者扼著阮的頷頸；阮厭倦得著歇睏。
5:6 阮投降埃及人及亞述人，因為欲得著米糧通食飽。
5:7 阮的列祖犯罪，今無去啦；阮著擔當的罪過。
5:8 奴僕管轄阮，無人救阮脫離的手。
5:9 阮拼生命來得著米糧，因為有刀劍佇曠野。
5:10 阮的皮膚黑親像火爐，因為飢荒來發熱。
5:11 佇錫安強姦婦仁人，以及猶大諸個城的在室女。
5:12 縛許個貴族的手給吊離地，見著老大的面亦無尊敬。
5:13 少年人扛石磨，囝仔擔柴，致到跋倒。
5:14 老人無閣坐佇城門口；少年人無閣作樂。
5:15 阮的心快樂已經息，阮的跳舞變做悲哀。
5:16 阮頭殼頂的冕旒磕落；阮有災禍啊！因為阮有犯罪。
5:17 因為按呢阮的心暈去，因為按呢阮的目睭花。
5:18 是為著錫安山拋荒，山狗行遊佇彼頂面。
5:19 耶和華啊，你是永遠佇；你的寶座代代無息。
5:20 你啥事永遠記得阮？啥事棄拺阮到許久？
5:21 耶和華啊，求你互阮越轉歸你，阮就越轉。求你換新阮的日，親像早時一樣。
5:22 你一盡棄拺阮，受氣阮到極？